Aqparat jáne qoǵamdyq damý mınıstri Aıda Balaeva Amangeldi Seıithannyń otbasy men jaqyn týystaryna kóńil aıtty, dep habarlaıdy Egemen.kz.
«Sum ajal aramyzdan taǵy bir áriptesimizdi, belgili jýrnalıst, sport kommentatory Amangeldi Seıthan aǵamyzdy mezgilsiz alyp ketti.
Talaıdy tánti etken talantymen de, kásibı sheberligimen de, ańqyldaǵan aqjarqyn kóńilimen de kórermendi baýrap, álemniń alty buryshynan alashyna jaǵymdy jańalyqtyń jarshysy bolǵan jampoz jan, jalyndy azamat edi. Sóz joq, Amangeldi Mýathanuly óziniń bilimi men egemendiktiń alǵashqy jyldarynda sport telejýrnalıstıkasynda alǵan qundy tájirıbesin jastarmen bólisip, izin basqan mamandarǵa úıretip ketti. Dese de, tabıǵatynan aqyndyǵy men adamı asyldyǵy jarasqan tulǵanyń ótken joly da, halyqtyń júreginde alar orny da bólek bolyp qalary anyq. Al onyń esimi otandyq telejýrnalıstıka tarıhyna ǵana emes, tutastaı sport shejiresine altyn árippen jazylady. Basqa túsken osynaý qaıǵyǵa ortaqtasyp, marqumnyń otbasy, týǵan-týystaryna kóńil aıtamyn», dedi mınıstr.