Jambyl oblysynyń Baızaq aýdany aýmaǵyndaǵy jergilikti mańyzy bar «Sarykemer-Úshbulaq» kólik jolynda jantúrshigerlik jol apaty boldy, dep habarlaıdy Egemen.kz.
«Folksvagen-Passat» markaly avtokóliginiń 27 jastaǵy júrgizýshisi rýldi basqara almaı, beton baǵanaǵa soǵylǵan.
Jol-kólik oqıǵasy saldarynan oqıǵa ornynda 12 jasar bala qaza tapty, al 11 jastaǵy bala túrli dene jaraqattarymen Baızaq aýdanynyń ortalyq aýrýhanasyna jetkizilip, aýrýhanaǵa jatqyzyldy.
Kólik apatynan keıin júrgizýshi kólikti oqıǵa ornynda qaldyryp, belgisiz baǵytqa qashyp ketken.
«Atalǵan derekke qatysty QR QK 345-babynyń 3-bóligi, 347-baby (Aýyr zardaptar týyndaǵan jaǵdaıda kólik quralyn basqaratyn jáne jol júrisi nemese kólik quraldaryn paıdalaný qaǵıdalaryn buzǵan adamnyń jol-kólik oqıǵasy bolǵan jerden ketip qalýy ) boıynsha sotqa deıingi tergeý amaldary bastaldy. Oqıǵanyń mán-jaıy anyqtalýda, tıisti sot saraptamalary taǵaıyndaldy», delingen oblystyq polısııa departamentiniń habarlamasynda.
Jedel izdestirý sharalarynyń nátıjesinde júrgizýshi anyqtalyp, ony bultartpaý sharasyn tańdaý máselesi sheshilýde.
Qazirgi tańda qylmystyq is boıynsha tergeý áreketteri júrgizilýde. Polısııa departamenti Qazaqstan Respýblıkasy Qylmystyq-prosestik kodeksiniń 201-babynyń talaptaryna sáıkes, basqa derekter tergeý múddesinde jarııalaýǵa jatpaıtyndyǵyn habarlaǵan.