Qazaqstan men Koreıa «Samal jel» baǵdarlamasyn jandandyrýǵa ýaǵdalasty, dep habarlaıdy Egemen.kz.
Osy arqyly Qazaqstanǵa jańa ınvestısııa men joǵary tehnologııalar keledi. Sondaı-aq ekijaqty yqpaldastyqqa tyń serpin berý úshin Pýsanda Qazaqstannyń Bas konsýldyǵy ashylmaq. Bul týraly Qasym-Jomart Toqaev pen Mýn Chje In kelissózderdiń qorytyndysy boıynsha brıfıngte aıtyldy.
Qasym-Jomart Toqaev Koreıa Qazaqstannyń Azııa aımaǵyndaǵy ekinshi saýda seriktestigi ekenin aıta kele, ótken jyldyń qorytyndysy boıynsha eki eldiń saýda-sattyq kólemi 5,9 mlrd dollarǵa jetkenin jetkizdi. Aldaǵy meje – osy kórsetkishti aıtarlyqtaı arttyrý. Qos tarap kelissózder barysynda endi shıkizattyq emes taýar aınalymyn ulǵaıtyp, ony ártaraptandyrýǵa kelisti. Bul rette aýyr ónerkásip pen mashına jasaý, taý-ken jáne barlaý, balamaly energetıka salalaryna basymdyq berilmek.
«Qazaqstanda ınnovasııalyq óndiristerge degen suranys joǵary. Ásirese kommýnıkasııa, aýyl sharýashylyǵy, medısına jáne farmasevtıka jobalaryna basa mán beremiz. Koreıanyń tájirıbesi mol, áleýeti de zor. Osyǵan oraı búgin eki eldiń kompanııalary birqatar kelisimshartqa qol qoıady. Qazaqstanda áli de tolyq ıgerilmegen salalar kóp. Sondyqtan qazaq jerine kelýge yntaly koreı kompanııalary men kásipkerlerine jan-jaqty qoldaý kórsetýge daıynbyz. Biz saýda-ekonomıkalyq yntymaqtastyq jónindegi Qazaqstan-Koreıa úkimetaralyq komıssııasy men iskerlik keńestiń jumysyn jandandyrýǵa ýaǵdalastyq. Ekijaqty yqpaldastyqqa tyń serpin berý úshin Pýsanda Qazaqstannyń Bas konsýldyǵyn ashý týraly sheshim qabyldadyq. Bul – seriktestigimizdi strategııalyq rýhta damytýdyń taǵy bir joly. Kelesi jyly Qazaqstan men Koreıanyń dıplomatııalyq qatynas ornatqanyna 30 jyl tolady», dedi Qazaqstan Respýblıkasynyń Prezıdenti Qasym-Jomart Toqaev.