Jyl basynan beri pavlodarlyq polıseıler ıesiz jaıylyp júrgen 4936 bas maldy anyqtady. Janýarlar aıyppul turaǵyna aıdalsa, olardyń ıeleri jaýapkershilikke tartyldy, dep habarlaıdy Egemen.kz Pavlodar oblystyq PD baspasóz qyzmetiniń Instagram paraqshasyna silteme jasap.
Baqylaýsyz jaıylyp júrgen mal urylar úshin - ońaı olja, al júrgizýshiler úshin - qaıǵyly jol-kólik oqıǵasy bolýy múmkin.
Tereńkól aýdanyndaǵy «Omby-Maıqapshaǵaı» avtojolynyń 324 shaqyrymynda patrýldik polısııa qyzmetkerleri qaraýsyz jaıylyp júrgen sıyrlardy anyqtady, nátıjesinde 10 sıyr arnaıy aıyp turaǵyna qamaldy.
Iri qaranyń ıesi bolyp tabylatyn 40 jastaǵy aýyl turǵyny QR ÁQBK 408-baby boıynsha ákimshilik jaýapkershilikke tartylyp, 3 AEK mólsherinde aıyppul ótedi.
Dál sondaı derek «Lenın-Aqsý» avtojolynyń 11 shaqyrymynda tirkelgen. Iri qara mal qysta mal azyǵyna arnalǵan shópti taptap, shabyndyqta baqylaýsyz jaıylyp júrgen.
Ýchaskelik polısııa ınspektory 34 bas maldy aıyppul turaǵyna qamady. 55 jastaǵy mal ıesi QR ÁQBK 408-baby boıynsha ákimshilik jaýapkershilikke tartyldy.
«Jyl basynan beri pavlodarlyq polıseıler baqylaýsyz jaıylyp júrgen 4 936 maldy anyqtady, olar aıyppul turaǵyna qamaldy. Búgingi kúni oblys aýmaǵynda malǵa arnalǵan 146 aıyppul turaqtary jumys isteıdi», dedi Pavlodar oblystyq polısııa departamentiniń patrýldik polısııa rotasy komandıriniń mindetin atqarýshy Ádilet Merǵazın.