«Ádildik joly» respýblıkalyq qoǵamdyq birlestigi men respýblıkalyq zań konsýltanttary alqasy arasynda yntymaqtastyq týraly memorandým jasasý aıasynda Qazaqstanda tegin zań kómegi qosymshasy iske qosyldy, dep habarlaıdy Egemen.kz.
«Ádildik joly» RQB atap ótkendeı, qazirgi ýaqytta alqaǵa 3 000-ǵa jýyq zań konsýltanttary kiredi.
«Bul, ásirese, úıden shyqpaı-aq tegin keshendi zań kómegin ala alatyn áleýmettik osal azamattar men aýyldyq jerlerdiń turǵyndary úshin tıimdi», delingen aqparatta.
«Memorandýmnyń maqsaty - halyqtyń áleýmettik muqtaj toptaryna jáne basqa da azamattarǵa quqyqtyq kómek kórsetý. Quqyqtyq aǵartý, ásirese muqtajdar arasynda quqyqtyq memleketti nyǵaıtýǵa qyzmet etetin bolady», dedi Respýblıkalyq zań konsýltanttary alqasynyń tóraǵasy Serik Aqylbaı.
«Halyqtyń quqyqtyq saýattylyǵyn arttyrý sybaılas jemqorlyqqa qarsy is-qımyldyń tıimdi ádisi bolyp tabylady. «LawCenter» qosymshasy quqyqtyq kómekti neǵurlym aýqymdy túrde uıymdastyrýǵa múmkindik beredi. Qosymshany júktep alǵan árbir qazaqstandyq óz suraǵyn qoıyp, ony zań keńesshilerine jibere alady», dedi «Ádildik joly» RQB tóraǵasy Dıdar Smaǵulov.