Kýbok kimge buıyrady?

Qazaqstan kýbogy jolyndaǵy jarysty uıymdastyrýshylar bıylǵy týrnırdi barynsha tartysty ári qyzyqty ótkizý úshin aldymen Birinshi jáne Ekinshi lıga komandalary arasynda úsh kezeń­nen turatyn irikteý oıyndaryn ótkizip, irikteýden irkilmeı ótken eń úzdik eki klýbqa Premer-lıga komandalarymen birge toptyq kezeńde oınaýǵa múmkindik berdi. Al buǵan deıingi ereje boıynsha kýbok oıyndarynda Birinshi lıga men Premer-lıga komandalary jerebe arqyly bir-birimen kezdesip, jeńiske jetken komanda 1/16, 1/8 sııaqty kelesi kezeńderge ótetin edi.

Sóıtip jańa formattaǵy Qazaq­stan kýbogynyń birinshi já­ne ekinshi kezeńine Birinshi jáne Ekinshi lıgadan barlyǵy 14 fýtbol klýby qatysty. Olar­dyń 12-si jerebe boıynsha ózara jup qurap, birinshi kezeńde oına­sa, qalǵan eki komanda ekin­shi kezeń­nen bastap synǵa tústi. Al­ǵashqy eki irikteý oıyndaryna «Igi­lik», «Oqjetpes», «Aqsý», «Qy­ran», «Ońtústik aka­demııasy», «Maqta­aral», «Eki­bastuz», «Altaı», «SD Family», «Rýzaevka», «Jas Qyran», «Iаssy-Túrkistan», «Jeńis» jáne SDIýSShOR № 8 (Nur-Sultan q.) komandalary qatysty.

Bastapqy eki kezeńniń qory­tyndysy boıynsha, týrnırdiń sońǵy irikteý kezeńine elorda­nyń SDIýSShOR №8, Shymkent­tiń «Ońtústik Akademııasy», Eki­bastuzdyń «Aqsý» jáne Túrkistan oblysynyń «Maqtaaral» komandalary ótti. Úshinshi kezeńniń jerebesi boıynsha toptyq ke­zeńge shyǵý úshin SDIýSShOR №8 men «Ońtústik Akademııasy» jáne «Maqtaaral» men «Aqsý» komandalary kezdesti. Bir oıyn­nan turatyn básekede jeńiske jetken SDIýSShOR №8 jáne «Maqtaaral» klýbtary Pre­mer-lıga komandalarymen oınaý­ǵa múmkindik aldy.

Al bir jarym aıǵa jalǵasqan toptyq kezeńde Premer-lıganyń 14 jáne irikteý kezeńinen ótken Birinshi jáne Ekinshi lıganyń 2 komandasy tórt topqa bólinip, ózara shırek fınal joldamasyn sarapqa saldy. Sóıtip óz tobynan daralanyp shyqqan Qaraǵandynyń «Shahter», Pet­ro­pavldyń «Qyzyljar», Qos­tanaıdyń «Tobyl», Tarazdyń «Taraz», elordanyń «Astana», Qyzyl­ordanyń «Qaısar», Aq­taýdyń «Kaspıı» jáne Alma­tynyń «Qaırat» klýbtary jarysty odan ári jalǵastyrýǵa múmkindik aldy.

Osydan birer kún buryn 1/4 fı­naldyń jerebesi tartylyp, jartylaı fınaldyń joldamasyn sarapqa salatyn tórt jup anyqtaldy. Jerebe boıynsha, «Taraz» – «Shahter», «Qaırat» – «Qaısar», «Astana» – «Kaspıı», «Qyzyljar» – «Tobyl» klýbtary ózara synǵa túsedi. Shırek fınaldyń birinshi oıyndary 21 jáne 22 tamyz kúnderine belgilense, qarymta kezdesýler 22 qyrkúıekke josparlanǵan. Jarystyń 1/4 jáne 1/2 fınaldyq satylarynda komandalar eki oıyn­nan ótkizedi. Fınal 28 qara­shaǵa belgilengen.

Qazaqstan fýtbol federa­sııasynyń habarlaýynsha, shırek fınaldyń birinshi oıyny jýyr­da ǵana ómirden ozǵan tanymal sport jýrnalısi Amangeldi Seıithanovty eske alýmen bastalady. «Qazaqstan kásipqoı fýtbol lıgasy osyndaı sheshimge keldi. Shırek fınaldyń 4 oıyny da bir mınýttyq únsizdikten bastalady», delingen federasııanyń habarlamasynda.

Sonymen qatar Qazaqstan ká­sip­qoı fýtbol lıgasy (QKFL) Kýbok oıyndarynyń al­dyn­­da shilde aıyndaǵy OLIMPBET-Qazaqstan chempıonaty men OLIMPBET-Qazaqstan kýbo­gynyń úzdik oıynshysyn anyq­tady. Úzdikterdi anyqtaý barysyn­da saýaldamaǵa qatysýshy bapker­ler men komanda kapıtandary úsh oıynshydan turatyn tizimin atady. Alǵan orynǵa baı­lanysty oıynshylarǵa upaı berildi: 1-oryn úshin – 3 upaı, 2-oryn úshin – 2 upaı, 3-úshin­shi oryn úshin – 1 upaı. Bar­lyq upaılardy qosý arqyly qorytyndy shyǵaryldy.

Saýaldama nátıjesinde ótken aıdyń úzdik oıynshysy dep «Shah­ter» klýbynyń tájirıbeli sha­býylshysy Aıdos Táttibaev tanyldy. Ol 21 upaıǵa ıe boldy. Atalǵan tizimde ekinshi orynǵa elordalyq «Astana» klýbynyń kóshbasshysy Marın Tomasov ornalasty. Ol Táttibaevtan bir upaı kem jınady. Úshinshi oryn «Qaırat» komandasynyń sha­býyl­shysy Artýr Shýshenachevke bu­ıyrdy. Ol 12 upaıǵa qol jet­kizdi.

Júldeni jeńimpazǵa OLIMPBET-fýtboldan Qazaq­stan kýbo­gynyń 5-týryndaǵy «Shah­ter» – «Ordabasy» oıyny­nyń aldynda QKFL atqarýshy dırektory Qýanysh Baqytbekov tapsyrdy.