Shymkent qalasynyń ákimi Murat Áıtenov qala pedagogtarynyń dástúrli tamyz konferensııasynda ustazdardy jańa oqý jylymen quttyqtady, dep habaralaıdy Egemen.kz.
Qala mektepteriniń dástúrli oqý formatyna oralýyna baılanysty qala basshysy balalardyń densaýlyǵyn saqtaý birinshi kezektegi másele ekendigin atap ótti.
Onyń aıtýynsha, zııatker urpaq tárbıeleý basty strategııalyq mindet pen zaman talaby bolyp belgilengen. Bilim salasynda maqsatty ındıkatorlyq kórsetkishter qoıylyp, adamı kapıtaldyń sapasyn arttyrý mindetteri mejelengen. Bul baǵytta Memleket basshysynyń tapsyrmasyna sáıkes, bilim berý uıymdarynyń qurylysyn júrgizý, olardyń jabdyqtalý deńgeıin arttyrý, bilim salasynda memlekettik-jekemenshik áriptestikti jolǵa qoıý, pedagog kadrlardyń áleýetin kóterý, taǵy basqa mańyzdy kórsetkishter qamtylǵan.
Aldaǵy 5 jylda qalada 72 mekteptiń qurylysyn júrgizý josparlanyp, úsh aýysymdy mektepter máselesi men mektebi joq shaǵynaýdandar men turǵyn alaptarda jańa mektepter salý belgilengen. Bıyl 32 mekteptiń qurylysy bastalsa, jyl sońyna deıin 20 mektep iske qosylmaq. Taǵy 16 mektep qurylysyna jeke ınvestorlar tartylǵan.
Qala basshysy pedagogtarǵa oqýshylar bilim olımpıadalary men ulttyq testileý kórsetkishterinen oq boıy ozyq turýy kerek degen talabyn jetkizdi. Balalardy kıberkeńistiktegi nashaqorlyq bıznesinen barynsha qorǵap, olardyń áleýmettik jelidegi belsendiligin baqylaýda ustaý máselesin de alǵa tartty.
«Búgin mektebine úles qosqan bala, erteń eline úles qosatyn bolady», dedi Murat Áıtenov óz sózinde.