«Islam memleketi» terrorıstik uıymy beısenbi kúni Kabýlda bolǵan eki jarylysty da moınyna aldy, dep habarlaıdy Egemen.kz.
CNN telekanalynyń málimetine qaraǵanda, birinshi jarylys áýejaıǵa kireberis mańda, ekinshisi áýejaıǵa jaqyn jerde ornalasqan Barron qonaqúıi janynda bolǵan. Bul aqparatty Pentagon ókili Djon Kırbı rastady.
Aýǵanstan densaýlyq salasynyń sheneýnikteri jarylystan kemi 60 adam qaıtys bolǵanyn, 140 adam jaralanǵanyn málimdedi. Qaza bolǵandardyń arasynda AQSh áskeriniń 12 múshesi bar.
Reuters agenttigi AQSh áskerindegi derekkózine silteme jasap, jarylysty jankeshti jasaǵanyn habarlaǵan.
Aýǵanstandaǵy ToloNews telearnasy jarylys bolǵan aımaqtan ondaǵan adamnyń aýrýhanaǵa jetkizilgenin aıtqan.
Resmı Vashıngton bul shabýyldyń artynda «Islam memleketi» terrorıstik tobynyń Horasan provınsııasyndaǵy ókilderi tur degen. Jarylystan birneshe saǵat ótken soń «Islam memleketi» Kabýldaǵy shabýyldy óz moınyna aldy.
AQSh áskerıleri Kabýlda shabýyl jıileı me dep qaýiptenedi.
Kabýl áýejaıy mańyndaǵy jarylys AQSh, Batys elderiniń azamattary men aýǵandar elden ketý úshin jantalasyp jatqan tusta boldy. «Talıban» Aýǵanstandaǵy bılikti qaıta qolǵa alǵan soń elden ketýge bel býǵan sheteldikter men aýǵanstandyqtar Kabýl áýejaıyna aǵylyp, dúrligý bastalǵan.
Buǵan qosa, «Talıban» AQSh pen onyń odaqtastaryna adamdaryn 31 tamyzǵa deıin Aýǵanstannan áketýdi talap etken.
26 tamyz tańerteń AQSh pen onyń odaqtastary «qolda bar senimdi dálelderine» súıenip, Kabýl áýejaıyna terrorlyq shabýyl jasalý qaýpi baryn eskertken. Biraq bul eskertýge qaramastan Kabýl áýejaıynda kóp adam bolǵan.