Vashıngton 26 tamyzda Kabýlde bolǵan jarylystardyń artynda kimder turǵanyn anyqtap, olardy jaýapqa tartýdy tapsyrdy, dep habarlaıdy Egemen.kz.
Bul týraly AQSh Prezıdenti Djo Baıden Aq úıdegi brıfıngte málimdedi.
– Osy shabýyldy jasaǵandar, sonymen birge Amerıkaǵa qastyq oılaǵandar, bilip júrińder: biz buny keshirmeımiz. Biz buny umytpaımyz. Biz izdep taýyp, jazasyn beremiz, – dedi Baıden.
AQSh Prezıdentiniń pikirinshe, Kabýldegi jarylystardy «Islam memleketi» terrorıstik uıymy uıymdastyrǵan bolýy múmkin. Baıden Pentagonǵa Aýǵanstan astanasynda terakt jasaǵan sodyrlarǵa soqqy jasaý josparyn daıyndaýdy tapsyrdy.
«Talıban» men IM sodyrlary osy shabýyldy birgen jasaǵan deýge AQSh-ta ázirge dálel joq. Baıdenniń aıtýynsha, tálipterge IM-men baılanys ornatý tıimsiz, óıtkeni olar AQSh-tyń Aýǵanstandaǵy adamdardy evakýasııalaýdy tezirek aıaqtaǵanyn qalaıdy.
Beısenbi kúni keshke Kabýl áýejaıynda bolǵan jarylystardan 103 adam qaza tapty, dep habarlady The Wall Street Journal. 150 adam jaralanǵan.
Shabýyl jaýapkershiligin «Islam memleketi» terrorıstik uıymy moınyna alǵan.