Qazaqstandyq ata-analardyń tamyz konferensııasy Zoom platformasynda ótip jatyr, dep habarlaıdy Egemen.kz.
Onlaın jıynǵa Qazaqstannyń túkpir-túkpirinen myńǵa jýyq ata-ata qatysýda. «Senim men bolashaq» respýblıkalyq ata-analar qoǵamdyq birlestiginiń uıymdastyrýymen ótip jatqan shara aıasynda «Jańa urpaq» jobasynyń avtory, otbasy koýchy Ashat Ábjanov, psıholog-pedagog Aıjan Ádilbaeva, «Senim men bolashaq» respýblıkalyq ata-analar qoǵamdyq birlestiginiń mamandary dáris oqyp, ata-analarmen trenıngter ótkizedi.
Zertteýshi pedagog Nurlan Imanǵalıev «Ata-ana jańa oqý jylyna qalaı daıyndalýy kerek» degen taqyrypta dáris oqyp, ýaqyt menedjmentin tıimdi uıymdastyrý joldaryna toqtaldy.
«Balańyz tabysty azamat bolyp jetilsin deseńiz, oǵan ýaqyt menedjmenti daǵdylaryn úıretýińiz kerek. Balaǵa birdeńe úıretpes buryn, ony áýeli ózińiz jetik bilýińiz qajet. Sondyqtan eń áýeli ýaqyt menedjmentin saýatty uıymdastyrýǵa kóńil bólińiz. Ata-analardyń kóbi balasy 11 synypqa kelgende ókinip jatatynyn jyl saıyn kórip júrmiz. Sondaı ókinish bolmaýy úshin balańyzdyń bolashaǵyn 4-5 jyl buryn josparlap daǵdylanyńyz. Bala armandaı alǵanymen, tabıǵatynan 4-5 jylǵa jospar qura almaıdy. Mysaly, IELTS-ten súrinbeı ótý úshin keminde 120 sabaq alý kerek. Al munsha kólemdegi bilimdi 1-2 aptanyń ishinde alyp úlgerý múmkin emes. Balanyń úlgerimine, synaqtarǵa daıyndyǵyna syn saǵat taıaǵanda emes, erte bastan daıyndalý mańyzdy», dep keńes berdi pedagog.
Ol, sondaı-aq balasynyń bolashaǵyna alańdaıtyn kez kelgen ata-ana qazirgi tehnologııanyń ıgilikterin óz ıkemine qaraı paıdalaný kerektigin nazarǵa saldy.
«Bilim berý júıesi jyl saıyn ózgerip jatyr. Ata-ana baǵany emes, ár pánniń úırený maqsattaryn bilý kerek. Ár pán boıynsha bala bir toqsanda neni úırený kerektigin toqsannyń basynda naqtylap alsańyz, onyń úlgerimin toqsan boıynda qadaǵalap otyra alasyz. Tek alǵan baǵasyn suraı bergennen taqyryp boıynsha pikir almasyp qadaǵalaý áldeqaıda tıimdi», dedi Nurlan Imanǵalıev.