Qasym-Jomart Toqaev Fransııa Prezıdenti Emmanýel Makronmen telefon arqyly sóılesti, dep habarlaıdy Egemen.kz Aqordaǵa silteme jasap.
Fransııa tarapynyń bastamasymen Qasym-Jomart Toqaev Emmanýel Makronmen telefon arqyly sóılesip, ekijaqty qarym-qatynastyń ózekti máselelerin jáne Aýǵanstandaǵy jaǵdaıdy jan-jaqty talqylady.
Memleket basshysy strategııalyq seriktestik deńgeıine jetken Qazaqstan men Fransııa arasyndaǵy ózara tıimdi baılanystardyń damýyna toqtaldy.
– Fransýz Respýblıkasy – ekonomıkalyq áleýeti jaǵynan álemdegi besinshi el, bizdiń negizgi seriktesimiz. Biz naqty nátıje beretin birlesken belsendi jumystarǵa, birinshi kezekte ekonomıka salasyna erekshe mán beremiz, – dedi Qazaqstan Prezıdenti.
Qasym-Jomart Toqaev Fransııany bizdiń ekonomıkamyzǵa 2005 jyldan beri 17 mıllıard qarjy salýy arqyly ınvestorlardyń alǵashqy bestigine kirip otyrǵanyn atap ótti. 2020 jyldyń qorytyndysy boıynsha ózara saýda kórsetkishi – 2,8 mıllıard dollardy quraǵan.
Emmanýel Makron Qazaqstanmen aradaǵy saýda-ekonomıkalyq jáne saıası baılanystardy tereńdete túsýge múddeli ekenin jetkizdi.
Memleketter basshylary úkimet deńgeıindegi baılanystardy jandandyrýǵa daıyn ekenderin naqtylady. Prezıdentter Qazaqstan men Fransııa yntymaqtastyǵyna serpin beretin jobalardyń júzege asýyna nazar aýdarýǵa ýaǵdalasty.
Qasym-Jomart Toqaev pen Emmanýel Makron Aýǵanstandaǵy ahýal jóninde pikir almasty.
Prezıdentter aımaqtyń turaqtylyǵy, qaýipsizdigi men ornyqty damýyna qatysty máselelerde jıi aqyldasyp turýǵa kelisti. Mundaı jumystar ekijaqty deńgeıde de, BUU alańynda jáne halyqaralyq formatta da júzege asyrylmaq.
Fransııa Prezıdentiniń ótinishi boıynsha Qasym-Jomart Toqaev oǵan Qazaqstannyń Aýǵanstandaǵy jaǵdaıdy turaqtandyrýǵa qatysty kózqarastary men bizdiń úkimettiń batys elderi azamattary men aýǵandyqtardy evakýasııalaý jóninde qabyldaǵan sharalary týraly aıtyp berdi. Emmanýel Makron Qazaqstannyń óz aýmaǵynda BUU-nyń Aýǵanstandaǵy mıssııasynyń qyzmetkerlerin jáne álemdik uıymnyń basqa da agenttikterin ornalastyrý týraly sheshimin joǵary baǵalady.