Nur-Sultanda aýdany 1200 sharshy metrdi quraıtyn ınklıýzıvti alań ashylady. Erekshe qajettilikti talap etetin balalarǵa arnalǵan bul keńistik osy jyldyń aıaǵyna deıin paıdalanýǵa berilýi múmkin, dep habarlaıdy Egemen.kz.
Jańa alań Botanıkalyq saıabaq aýmaǵynda ornalasady.
«Esil aýdanynda 1300-deı erekshe bala turady. Olardyń ózge balalar sekildi alańsyz oınap, kóńil kóterýine, shynyǵýyna qaýipsiz keńistik kerek. Úsh jyl buryn mesenattardyń kómegimen Ortalyq parkte alǵashqy ınklıýzıvti alań ashqan bolatynbyz. Araǵa ýaqyt salyp, Botanıkalyq saıabaq aýmaǵynda erekshe balalarǵa arnalǵan ekinshi alań salǵaly jatyrmyz. Bul – qaladaǵy eń úlken ınklıýzıvti alań bolǵaly tur, onyń aýdany 1200 sharshy metrge teń. Osy jyldyń aıaǵyna deıin jumysty aıaqtaý úshin qurylysty jyldamdatamyz», deıdi Esil aýdanynyń ákimi Berik Jákenov.
Sondaı-aq Esil aýdany aýmaǵynda basqa da abattandyrý jumystary júrgizilýde. Búginge deıin Esil ózeni jaǵasyndaǵy park rekonstrýksııadan ótkizildi, «Astana Opera» teatry mańyna jóndeý júrgizildi, Dárigerler alleıasy men emen alleıasy ashyldy, Atyraý kópiriniń tósemi aýystyryldy. Qazirgi tańda jeti jyl boıy rekonstrýksııa júrgizilmegen Ortalyq parktiń taqtalary men kespe tastary aýystyrylyp jatyr. Sportpen aınalysatyn turǵyndardyń ótinishimen «Serýen» kópiri astynda trotýar salynýda.
Aýdandaǵy aýlalar da jańa keıipke enýde. Bıyl 38 aýlada keshendi abattandyrý jáne jóndeý-qalpyna keltirý jumysy aıaqtalady. Odan bólek, aýdan aýmaǵynda 2 jańa gúlzar ashylady.
«Aýlalardy keshendi abattandyrý barysynda tennıs oınaýǵa arnalǵan ústelder, gımnastıkalyq alańdar, fýtbol jáne basketbol alańdary, tynysh demalys oryndary, workout-zonalar, jattyǵý zonalary, balalar alańqaılary, sondaı-aq úı janýarlaryn qydyrtýǵa arnalǵan zonalar paıda bolady. Munymen qosa hokkeı kortyn da salamyz. Qysta onda balalar hokkeı oınap, al jazda fýtbol alańy retinde paıdalana alady», deıdi Esil aýdany ákimi apparatynyń abattandyrý bólimi basshysy Jarqyn Aıtjanov.
Aıta ketsek, byltyr Esil aýdanyndaǵy 32 aýmaq abattandyrylǵan bolatyn, ásirese turǵyn alaptarǵa erekshe nazar aýdaryldy. Bıyl jaýapsyz qurylys ıeleri salǵan aýlalar men on jyldan asa jóndeý kórmegen alańqaılarǵa aıryqsha kóńil bólinip otyr.