Álemde 4 mıllıardtan astam adam koronavırýstyq pandemııadan týyndaǵan daǵdarys jaǵdaıynda áleýmettik saqtandyrý sharalarymen qamtylmaǵan, dep habarlaıdy Egemen.kz Halyqaralyq eńbek uıymynyń (ILO) saıtyna silteme jasap.
BUU-nyń mamandandyrylǵan mekemesi bolyp tabylatyn ILO sarapshylarynyń derekteri boıynsha, qazirgi ýaqytta álem halqynyń tek 47%-y ǵana áleýmettik saqtandyrýmen qamtylǵan, al 4,1 mıllıard adam ulttyq áleýmettik qorǵaý júıelerinen eshqandaı saqtandyrý tólemderin almaıdy.
Baıandama avtorlary áleýmettik qorǵaý salasyndaǵy mańyzdy aımaqtyq teńsizdikke erekshe nazar aýdardy. Eýropa men Ortalyq Azııada áleýmettik saqtandyrýmen turǵyndardyń 84%-y qamtylǵan, bul álemdegi eń joǵary kórsetkish bolyp tabylady. Amerıkada bul qamtý 64,3%, Azııa-Tynyq muhıty aımaǵynda - 44%, arab elderinde - 40%, Afrıkada - 17% quraıdy.
«Biz tıimdi jáne jan-jaqty áleýmettik qorǵaý tek áleýmettik ádilettilik pen laıyqty eńbekti ǵana emes, sonymen birge turaqty bolashaqty qamtamasyz etýdiń mańyzdy quraly ekenin moıyndaýymyz qajet», deıdi ILO bas dırektory Gaı Raıder.
Sondaı-aq, qujatta álemdegi balalardyń basym kópshiligi áli de tıimdi áleýmettik qorǵaýdan aıyrylǵandyǵy kórsetilgen. Álemde tek árbir tórtinshi bala belgili bir áleýmettik járdemaqy nemese jeńildikterdi paıdalanady. Jańa týǵan balalary bar áıelderdiń tek 45%-y ǵana analarǵa arnalǵan aqshalaı járdemaqy alady.
Múgedektik boıynsha járdemaqyny densaýlyǵy nashar árbir úshinshi adam alsa, jumyssyzdyq boıynsha járdemaqymen odan da az adamdar qamtylǵan. Is júzinde ony álemdegi jumyssyzdardyń tek 18,6%-y ǵana alady.
Sarapshylardyń esepteýinshe, halyqty bazalyq áleýmettik saqtandyrýmen tolyq qamtý úshin tabysy az elderge jyl saıyn osy salaǵa 77,9 mıllıard dollar, ortasha kirisi bar memleketterge - 362,9 mıllıard, al tabysy joǵary elderge - 750,8 mıllıard ınvestısııalaý qajet.