Shymkent qalasynyń ákimi Murat Áıtenov Memleket basshysynyń «Halyq birligi jáne júıeli reformalar - el órkendeýiniń berik negizi» Qazaqstan halqyna arnaǵan Joldaýynda aıqyndalǵan mindetterdi qala aýmaǵynda iske asyrýdyń júıeli tártibin jarııa etti, dep habarlaıdy Egemen.kz.
Qala ákimi bul saıası qujatta memleket damýynyń strategııalyq basymdyqtary aıqyndalyp, ekonomıkalyq damý, densaýlyq saqtaý, bilim berý, óńirlik damý sııaqty mańyzdy 7 baǵyt boıynsha iske asýy tıis mindetter belgilengenin atap ótti.
Qalanyń áleýmettik-ekonomıkalyq damýy Prezıdenttik Joldaý aıasynda qabyldanatyn Jalpyulttyq jospar boıynsha júzege asyrylady.
«Ekonomıkalyq ósimge qol jetkizýde kásipkerlikti qoldaýǵa 7 mıllıard teńge baǵyttalyp, 2250 bıznes ókilderine qoldaý kórsetiletin bolady. «Bıznestiń jol kartasy» boıynsha 1 myń joba qamtylady. «Bıznestiń jol kartasy» jáne «Qarapaıym zattar ekonomıkasy» baǵdarlamalary aıasynda búginge deıin 57,4 mıllıard teńgege 1 788 joba qarjylandyrylyp, 7,2 myń jumys orny ashyldy. «Qarapaıym zattar ekonomıkasy boıynsha bıylǵa josparlanǵan 80 jobanyń 61-i qarjylandyryldy. Qalanyń eksporttyq áleýetin arttyrýda «Juldyz» ındýstrıaldy aımaǵynda 200 mıllıard teńgege 60 iri jobany, «Standart» jeke ındýstrıaldy aımaqta 180 mıllıard teńgege 30 jobany iske asyrý múmkindigimiz bar. Halyqty azyq-túlik ónimimen tolyq qamtamasyz etý baǵytynda 2 agroındýstrıaldy aımaqtyń qurylysy bastaldy. Aýylsharýashylyq ónimderin tereń óńdeýde «Bozaryq» tamaq ónerkásibi ındýstrıaldy aımaǵy qurylyp, quny 23 mıllard teńgeni quraıtyn 21 joba iske asady», dedi qala ákimi.
Qalada azyq-túlik taýarlarynyń baǵasyn turaqtandyrý, agroónerkásipti damytý sheńberinde 136 gektarǵa zamanaýı ónerkásiptik jylyjaı̆ keshenderi salynady. Munda 30 mıllıard teńgege 20 joba júzege aspaq.
Búginde qalada 3 áleýmettik dúken jumys isteıdi. Jyl sońyna deıin qosymsha 7 áleýmettik dúken ashý josparlanýda. Oǵan qosa, 2025 jylǵa deıin 1 myń tósek oryndyq aýrýhana, 10 medısınalyq mekeme, 12 dárigerlik ambýlatorııa iske qosylmaq.
Tikeleı efırdi qorytyndylaı kele, Murat Dúısenbekuly Memleket basshysynyń Joldaýy memlekettik turǵydaǵy mejelerdi belgileıtinin atap ótip, el turmysyn túzeýge, azamattardyń ómir sapasyn arttyrýǵa qyzmet etetinin jetkizdi.