Qazaqstan zańnamasyna «dinge senbeıtinder quqyǵy» túsinigin engizý josparlanýda. Bul týraly QR Aqparat jáne qoǵamdyq damý mınıstrligi din isteri komıtetiniń tóraǵasy Erjan Núkejanov aıtty, dep habarlaıdy Egemen.kz.
«2017 jyly burynǵy Din isteri jáne azamattyq qoǵam mınıstrligi deıster men ateısterdiń quqyqtaryn qorǵaý týraly zań jobasyn bastaýǵa tyrysty. Qazirgi ýaqytta osy zańdy engizý nemese ázirleý boıynsha jumys júrgizilip jatyr ma?», degen suraq qoıyldy Ortalyq kommýnıkasııalar qyzmetindegi baspasóz máslıhatynda.
«Buǵan deıin óz baıandamamda dinge senetinderdiń de, senbeıtinderdiń de quqyqtaryn tolyq qamtamasyz etýge tyrysatynymyzdy aıttym. Osyǵan baılanysty biz álemdik tájirıbege súıene otyryp, naqty túzetýler aıasynda «dinge senbeıtinder quqyǵy» túsinigin engizgimiz keledi. Iаǵnı, qazir «dinge senetinder quqyǵy» bar, sonymen birge «dinge senbeıtinder quqyǵyn» da engizgimiz keledi», dep jaýap berdi E. Núkejanov.
E. Núkejanov Qazaqstannyń zaıyrly memleket ekenin jáne dinge, konfessııaǵa, etnosqa qaramastan zań bárinen joǵary turatynyn atap ótti.
«Biz osyǵan umtylamyz jáne zań oryndalady», dedi E. Núkejanov.