QR QM Memlekettik kirister komıteti tóraǵasynyń orynbasary Jaıdar Ińkárbaev brıfıng barysynda shekaralyq ótkizý pýnktterinde kólik qozǵalysynyń búkil sıkli avtomattandyrylatynyn habarlady, dep jazady Egemen.kz.
«Kedendik ınfraqurylymdardy, ıaǵnı, josparlanǵan 10 ótkizý pýnktin jańǵyrtý kólik qozǵalysyn 2-den 6 jolaqqa deıin keńeıtý josparda. Táýligine ótkizý qabileti 8 ese artady. Shekaradan ótý ýaqyty 30 mınýtqa deıin qysqarady. Kólik quraldarynyń toqtaýsyz qozǵalysy úshin tehnıkalyq baqylaýdyń biryńǵaı tolassyz avtomattandyrylǵan dálizderin paıdalaný esebinen kólik quraly qozǵalysynyń búkil sıkli avtomattandyrylatyn bolady», dedi ol Ortalyq kommýnıkasııalar qyzmetinde ótken baspasóz máslıhatynda.
Tóraǵa orynbasarynyń aıtýynsha, búgingi kúni naqty ýaqyt rejıminde marshrýtty qadaǵalaý úshin navıgasııalyq plombalar qoldanylýda. Elektrondy kezek júıesiniń tájirıbesi «Nur joly» ótkizý pýnktindegi kezekti aldyn ala brondaý basqa da ótkizý pýnkterine qoldanylady. Atalǵan is-sharalardyń nátıjesinde jalǵan tranzıt úlesin 2019 jylǵy 28 paıyzdan bıyl 1,3 paıyzǵa deıin tómendetýge qol jetkizildi.
«Osy jyldyń basynan bastap jalǵan alýshylardyń mekenjaıyna taýarlardy ákelýdiń barlyǵy 177 faktisi anyqtaldy. О́tken jyldary osyndaı 11 myń fakt anyqtalǵan bolatyn. Qabyldanyp jatqan is-sharalar osy jyly EAEO ımporttalatyn taýarlar boıynsha QQS túsimderiniń ósý qarqynyn ótken jylmen salystyrǵanda 136 paıyzǵa nemese 149 mlrd teńgege artyq qamtamasyz etti», dep naqtylady Jaıdar Ińkárbaev.