«Astana Operanyń» talantty ánshisi, atalǵan teatrdaǵy opera trýppasynyń basshysy, Qazaqstannyń eńbek sińirgen qaıratkeri Azamat Jyltyrkózov elimizdiń vokaldyq klassıkalyq óneri tarıhynda alǵash ret álemdik deńgeıdegi biregeı jobaǵa – Vınchenso Bellınıdiń «Pýrıtandar» operasynyń CD-dısktegi aýdıojazbasyn jasaýǵa qatysty. Onymen birge operany belkanto juldyzdary – tenor Loýrens Braýnlı, soprano Sara Kobýrn (AQSh) oryndady.
DELOS amerıkalyq halyqaralyq dybys jazý kompanııasy álemde 40 jyldan astam ýaqyt boıy jumys istep keledi. Onyń jazbalary birneshe ret Gremmı syılyǵyna usynylǵan. Sonymen birge aıtýly jobaǵa lıtvalyq solıster de qatysty. Jazbaǵa bastamashylyq tanytqan Nıý-Iork qalalyq operasynyń jańadan taǵaıyndalǵan mýzykalyq jetekshisi, áıgili dırıjer Konstantın Orbelıan.
− El tarıhynda alǵash ret V.Bellınıdiń «Pýrıtandar» operasyna qatysyp, biregeı aýdıodıskini jazý – men úshin úlken tájirıbe boldy. Tanymal koých, dırıjer Djon Fıshermen jumys isteý úshin bir apta erte keldim. Jazý barysy asqan dáldikpen júrgizildi, ol tórt bólimnen turdy. Týyndyny jazý, shamamen eki aptaǵa sozylsa da, bári de kóńilimnen shyqty. Álemde Bellınıdiń «Pýrıtandar» operasy jazbasynyń birli-jarym nusqalary bar. Bul shyǵarma – opera óneriniń shyńy, belkanto jaýhary, sondyqtan ánshiniń sheberligi myqty bolýy kerek, sebebi belkanto – vokaldyq tehnıkany meńgerýdiń eń bıik kórsetkishi, − dep atap ótti Azamat Jyltyrkózov.
Shynyn aıtqanda, bul álemdik mýzyka úshin ǵana emes, otandyq opera óneri úshin de aıtýly oqıǵa. Eksklıýzıvti dıskiniń muqabasynda daryndy jerlesimizdiń esimi jazylady. Endi Azamat Jyltyrkózov halyqaralyq tájirıbesin óz elimizde paıdalanyp, sheteldik áriptesterimen birlesip, qazaqstandyq oryndaýshylarmen, dırıjerlermen ulttyq opera repertýaryn jazýǵa nıettenip otyr.