Elimizde stýdenttik jataqhanalardy tekserý bastaldy. Reıdti «Jas Otan» Jastar qanatynyń jáne «Nur Otan» partııasy janyndaǵy jastardy qoldaý jónindegi respýblıkalyq qoǵamdyq keńestiń ókilderi uıymdastyrdy, dep habarlaıdy Egemen.kz.
«Jas Otan» Jastar qanatynyń tóraǵasy Nurjan Jetpisbaev, QR Parlamenti Májilisiniń depýtaty Elnur Beısenbaev jáne jastardy qoldaý jónindegi óńirlik Qoǵamdyq keńestiń ókilderi Qaraǵandy oblysynyń joǵary oqý oryndary men kolledjderiniń jataqhanalaryna monıtorıng júrgizýdi bastady.
Monıtorıngtik top músheleri bolashaq dárigerlerge arnalǵan 400 tósek-oryndyq stýdenttik úı salynyp jatqan «Qaraǵandy medısına ýnıversıteti» KEAQ jataqhanasynyń qurylys alańyna bardy. Sonymen qatar, Qaraǵandy tehnıkalyq ýnıversıteti men Qaraǵandy ındýstrııalyq ýnıversıtetiniń jataqhanalary qaraldy.
Partııa músheleri jataqhanalardyń sýmen jabdyqtaý, jylýmen jabdyqtaý, jaryqtandyrý, sanıtarlyq normalarǵa, úı-jaılardy kútip ustaý jáne onda turý jaǵdaılaryna sáıkestigin tekserdi. Monıtorıng qorytyndysy boıynsha Kópsalaly gýmanıtarlyq tehnıkalyq kolledjiniń jataqhanasynda birqatar buzýshylyqtar anyqtaldy.
«Biz stýdentterge olardyń jaıly oqýy úshin barlyq jaǵdaı jasalýy tıis degen máseleni kóteremiz. Biraq, bul mekemelerdiń basshylary buǵan qyzyǵýshylyq tanytpaıdy jáne aqshanyń jetispeıtindigin aıtady. Munda qarapaıym sanıtarlyq normalar saqtalmaıtynyn kóremiz. Eki adam turýy kerek bir bólmede úsheýi turady. Ystyq sý joq, órt qaýipsizdigi nólge teń. Qaraǵandynyń ýákiletti organdary barlyǵyn retke keltirip, qolǵa alýy tıis dep esepteımin», dedi depýtat Elnur Beısenbaev.
Qaraǵandyda jataqhanalarǵa 2000-ǵa jýyq stýdent muqtaj. Ishinara oryn jetispeýshiligi máselesi sheshilýde. Jaqynda 800-den astam jas 6 jańa jáne jóndelgen ǵımaratta tura alady. «Jas Otan» Jastar qanatynyń jetekshisi Nurjan Jetpisbaev bul másele olardyń jeke baqylaýynda ekenin atap ótti.
«Bul jumysty biz áli de jalǵastyratyn bolamyz. Qazir biz jataqhanalarda jyl sońyna deıin joıylýǵa tıis buzýshylyqtardy anyqtaý úshin tekserýdemiz. Tekserýlerden keıin biz JOO basshylyǵyna usynystar berip, mınıstrlik deńgeıinde jumys júrgizemiz. Jyl sońyna qaraı qaıta monıtorıng júrgiziledi. Eń basty mindet – stýdent jastardyń áleýmettik-turmystyq, turǵyn úı jaǵdaılaryn jaqsartý», dedi ol.