Premer-Mınıstrdiń orynbasary Eraly Toǵjanov Memleket basshysynyń Qazaqstan halqyna Joldaýynda belgilengen eldiń bıoqaýipsizdigin qamtamasyz etý jónindegi tapsyrmalary aıasynda «Antıgen» ǵylymı-óndiristik kásipornynyń jumysymen tanysty, dep jazady Egemen.kz.
Qazirgi ýaqytta bul kásiporyn QR BǴM Bıologııalyq qaýipsizdik problemalary ǵylymı-zertteý ınstıtýtynyń seriktesi sanalady.
BQPǴZI «Antıgen» alańyn paıdalana otyryp, medısınalyq vaksına, onyń ishinde QazVac shyǵarýdyń tolyq sıkli boıynsha ekinshi óndiristik alańdy ázirlep, iske qosty. Osy maqsatta Almaty oblysy ákimdiginiń qoldaýymen jeńildetilgen nesıe boıynsha vaksına óndirýge arnalǵan jańa tehnologııalyq jabdyqtar satyp alyndy. Aǵymdaǵy jyldyń qyrkúıek aıynda qýaty aıyna 1 mln dozaǵa deıin jetetin «Antıgen» alańynda QazVac vaksınasynyń 300 myń valıdasııalyq serııasy shyǵaryldy.
Halyqaralyq sapa standarttary kásiporynǵa óndiristiń barlyq ýchaskelerinde joǵary tehnıkalyq deńgeıge, sapa men senimdilikke qol jetkizýge múmkindik beredi. «Antıgen» ǴО́K «OtarBioPharm» JShS janyndaǵy bıofarmasevtıka zaýytymen qatar BQPǴZI ázirlegen QazVac qazaqstandyq vaksınasyn shyǵarý boıynsha ekinshi óndiristik alańǵa aınaldy.