Asqar Mamın GFR bıznes ókilderimen Qazaqstanda birlesken jobalardy iske asyrýdy talqylady, dep habarlaıdy Egemen.kz.
«QR Premer-Mınıstri Asqar Mamın GFR bıznesiniń, sondaı-aq Germanııa ekonomıkasynyń shyǵys komıtetiniń ókilderimen kezdesý ótkizdi», dep habarlaıdy Qazaqstan Premer-Mınıstriniń baspasóz qyzmeti.
Taraptar jańartylatyn energetıka, gaz óńdeý, AО́K, mashına jasaý, taý-ken metallýrgııa ónerkásibi salalaryndaǵy birlesken jobalardy iske asyrýdyń jaı-kúıi men perspektıvalaryn talqylady.
Úkimet basshysy Germanııa Qazaqstannyń iri saýda seriktesteri men negizgi ınvestorlarynyń biri ekenin atap ótti. 2005 jyldan bastap GFR-dyń QR ekonomıkasyna tikeleı sheteldik ınvestısııalar kólemi shamamen $5,1 mlrd qurady.
«2021 jyldyń birinshi toqsanynda bul kórsetkish ótken jyldyń sáıkes kezeńimen salystyrǵanda 72%-ǵa ósip, $64,6 mln-nan asty, 2021 jyldyń birinshi jartyjyldyǵynda Qazaqstan men Germanııa arasyndaǵy taýar aınalymynyń kólemi 26%-ǵa $1,2 mlrd-qa deıin ósti, Qazaqstanda nemis kapıtalynyń qatysýymen energetıka, AО́K, mashına jasaý, qurylys jáne logıstıka salalarynda 950-den astam kásiporyn jumys isteıdi», dedi QR premer-Mınıstri.
Kezdesýge Premer-Mınıstrdiń orynbasary Roman Sklıar, Indýstrııa jáne ınfraqurylymdyq damý mınıstri Beıbit Atamqulov, Aýyl sharýashylyǵy mınıstri Erbol Qarashókeev, Energetıka mınıstri Maǵzum Myrzaǵalıev, ekologııa, geologııa jáne tabıǵı resýrstar mınıstri Serikqalı Brekeshev, «Samuryq – Qazyna» UÁQ» AQ Basqarma Tóraǵasy Almasadam Sátqalıev, QR GFR-daǵy Elshisi Dáýren Káripov jáne basqalar qatysty.