Soltústik Qazaqstan oblysyndaǵy «Qyzyljar Arlandary» sport klýbynyń múshesi Muhıt Tursynov Rýmynııanyń Konstansa qalasynda halyqaralyq etnıkalyq mádenıet festıvali aıasynda qazaq kúresinen ótken Álem kýbogynda jeńiske jetti, dep habarlaıdy Egemen.kz.
«Qazaq kuresi» qaýymdastyǵynyń málimetinshe, Rýmynııanyń Konstansa qalasynda ótken Álem Kýbogyna 21 elden 128 balýan qatysty. Jarysty Qazaqstan Respýblıkasynyń «Qazaq kuresi» qaýymdastyǵy, Rýmynııa «Qazaq kuresi» qaýymdastyǵy jáne Rýmynııa Syrtqy Ister mınıstrligi uıymdastyrǵan. Eki el birigip ótkizgen bul saıys - koronavırýs pandemııasy bastalǵaly beri qolǵa alynǵan alǵashqy iri halyqaralyq doda.
«Bul - Álem chempıonatynyń aldyndaǵy daıyndyq jarysy deýge bolady. Joǵary deńgeıde uıymdastyryldy. Oǵan halyqaralyq mamandardyń tól ónerimizge bergen joǵary baǵalary dálel. Jarys barysynda qazaqstandyq balýan Muhıt Tursynov 100 kg salmaq dárejesinde jeńimpaz atandy», delingen habarlamada.
Álem kýbogy barysynda ulttyq dástúr nasıhattalyp qana qoımaı, ózge kúres túrlerinen de festıvalder ótti. Atap aıtqanda, qurash, aba jáne qyrym kúresteri boıynsha saıystar, at jarys, sadaq atý, semserlesý, naızamen aıqasý syndy kóshpendiler oıyndary uıymdastyryldy.
Sondaı-aq, toǵyzqumalaq jáne mangala oıyndarynyń tanystyrylymy uıymdastyryldy. Qazaq kúresinen Álem kýbogynda top jarǵan sportshylar medaldarmen jáne aqshalaı syıaqymen marapattaldy.