Kúz kelse, kúzben birge teatrlardyń da máýesin jaıǵan aǵashtaı boıyndaǵy bar jaqsysyn kórermenine usynýǵa asyǵatyn daǵdysy bıyl da sol qalybynan aınymady. Elordalyq teatrlar birinen keıin biri jańa maýsymynyń shymyldyǵyn túrip, astana halqyn tamasha qoıylymdarymen tánti etip úlgerdi. Áıtse de bıylǵy maýsymnyń, ásirese, Nur-Sultan qalasy ákimdiginiń Jastar teatry úshin orny bólek. О́ner ujymy HV mereıli teatr maýsymynyń shymyldyǵyn túrdi.
15 jyl! Tarıh úshin kóp ýaqyt emes! Biraq teatr ujymy úshin bul 15 jyl qıyndyq pen qýanyshqa, jankeshtilik pen izdeniske, eńbek pen umtylysqa, jeńis pen jemiske toly úlken shyǵarmashylyq mektep, teńdessiz tájirıbe alańy.
Eki kún qatarynan bas qalaǵa óner meıramyn syılaǵan mereıli maýsymnyń ashylýyna elimizge belgili tulǵalar, óner qaıratkerleri quttyqtaı kelip, ózderiniń jyly lebizderin, aqjarma tilekterin bildiristi. Teatrǵa qaraı saǵynysa aǵylǵan talǵampaz kórermen rejısser, teatrdyń kórkemdik jetekshisi, Qazaqstannyń eńbek sińirgen qaıratkeri Nurqanat Jaqypbaıdyń sýretkerlik saraptaýynda sahna kórgen Talaptan Ahmetjannyń «Taptym. Ǵashyq boldym. Joǵalttym» mıýzıklin tamashalady. Aıtýly qoıylym jazýshynyń «Sulý men sýretshi» áńgimesiniń jelisi negizinde kórermenimen qaýyshyp otyr. Jyl basynda tusaýy kesilgen syrshyl mıýzıkl jańa maýsymnyń da kórermenine tamasha tartý boldy. Qoıylymda basty róldi, ıaǵnı Sulý men Sýretshi beınesin teatrdyń talantty akterleri – Nazerke Serikbolova men Meıirǵat Amangeldın kemeline keltire keıiptedi.
Máńgilik mahabbat taqyrybyn arqaý etken lırıkalyq spektakldegi esti áýen, utymdy tabylǵan rejısserlik sheshim, akterlik sheber oıyn kóp kóńilinen berik oryn aldy. Shámshi Qaldaıaqov, Erkeǵalı Rahmadıev, Keńes Dúısekeev, Seıdolla Báıterekov, Tólegen Muhamedjanov, Elena Ábdihalyqova bastaǵan birtýar kompozıtorlardyń júrek qylyn sherter áýezdi mýzykalyq týyndylarynyń sheber úılesimine qurylǵan aıtýly spektakl kórermenin de beıjaı qaldyrmady. Al qoıylym aldynda ótken buqaralyq aqparat quraldary ókilderine arnalǵan baspasóz konferensııasynda teatr dırektory, belgili teatr jáne kıno akteri, Memlekettik syılyqtyń laýreaty Ádil Ahmetov ujymnyń aldaǵy shyǵarmashylyq josparlarymen bólisti.
15 jyl boıy úzdiksiz kórýshisin tánti etip, tańǵaldyrýdan jalyqpaı kele jatqan Jastar teatrynyń ár qadamy men ónerdegi jemisti joly elordalyq kórermenniń kóz aldynda. Olaı deıtinimiz, 2007 jyldyń 5 shildesinde tuńǵysh ret Sh.Aıtmatov pen Á.Kekilbaevtyń shyǵarmalarynyń jelisi boıynsha jasalǵan «Shyńǵyshan» spektaklimen shymyldyq túrgen teatrdyń táı-táı basyp, búginge deıin jetken shyǵarmashylyq jetistigi men óneriniń ómirsheń órisi astanamen birge damyp, dańǵyldanyp keledi.
Iá, Arqa tórinde boı kótergen arý astana ýaqyt-aǵzam ajaryna belgi salǵan sanaýly jyldyń ishinde-aq saıası-ekonomıkalyq baǵyttyń barometri ǵana emes, ónerimiz ben mádenıetimizge uıytqy bolar ultymyzdyń shyn mánindegi rýhanı ómiriniń aınasyna aınalyp úlgerdi. Jer jahannyń nazaryn ózine burǵyzyp, jyl saıyn emes, aı saıyn, tipti kún saıyn qanatyn keńge jaıyp, qulpyryp, jaınap, el egemendigimen birge eńsesin tiktep, erke Esilmen egiz jasasqan bas qalamyzdyń baıandy tarıhy talaı ıgi bastamalar men ulaǵatty oqıǵalardyń sebepshisi hám dánekershisi bolyp keledi. Astana tamyryna tynys syılap, baǵytyna baǵdar bergen sondaı irgeli óner oshaǵynyń biri – dál osy Jastar teatry desek, tıtteı de artyq aıtqandyq emes.
Eń alǵash «Shyńǵyshan» spektaklimen shymyldyq túrip, osy ýaqytqa deıin óner shyńyn baǵyndyrýǵa umtylyp hám sol dodadan únemi jeńispen oralyp júrgen teatr ujymynyń jas teatrdyń tusaýyn keser qoıylym retinde dál osy áfsanany tańdaýy kezdeısoqtyq bolmasa kerek. Jastar teatrynyń shańyraq kótergenin súıinshilegen «Shyńǵyshandy» zor súıispenshilikpen qarsy alǵan ónersúıer qaýym úshin de, úmitin úkilep dodaǵa qosqan teatr ujymy úshin de atalǵan qoıylym aqjoltaı spektakl boldy. Jarty álemdi jaýlaǵan jeńimpaz jaıly shyǵarmamen tý tikken teatr kúni búginge deıin sol baıraqty tómen túsirmeı, óner alamanynda laıym jeńimpaz bolyp keledi. Teatr repertýaryn túrli baǵyttaǵy spektaldermen túrlendirip, talaı dodada top jarǵan ónerli ujymnyń alda áli de alar asýynyń mol bolaryna senim zor.