Nur Otan partııasynda «О́zgerister joly: Ár azamatqa laıyqty ómir!» saılaýaldy baǵdarlamasy qalaı júzege asyp jatqany talqylandy. Jyl basynan beri Elbasy, partııa Lıderi Nursultan Nazarbaevtyń tapsyrmasy boıynsha qabyldanǵan árbir óńir, qala jáne aýdan boıynsha 217 jol kartasy aıasynda respýblıkalyq ındıkatorlardyń 11%-y jáne óńirlik deńgeılerde 12%-y oryndaldy.
О́ńirlerde 7,7 mln sharshy metr turǵyn úı, 12,2 myń oryndyq 34 mektep, 15 medısınalyq nysan, 4,5 myń oryndyq 68 balabaqsha salyndy. 800 mlrd teńgege ınvestısııa tartyla otyryp, 77 jańa kásiporyn ashyldy. Turaqty jumys oryndaryna 160 myńnan astam adam jumysqa ornalastyryldy. Jyl sońyna deıin taǵy 200 túrli áleýmettik nysan, onyń ishinde jańa mektepter, aýrýhanalar jáne t.b. iske qosylady.
Mysaly, Nur-Sultan qalasynda medısınalyq qyzmet kórsetýdiń sapasy men qoljetimdiligin jaqsartý úshin 6 dárigerlik ambýlatorııanyń qurylysy aıaqtaldy. Almaty oblysynda jańa sement zaýytynyń ashylýyna baılanysty taǵy 500-ge jýyq jumys orny ashyldy. Túrkistan oblysynda 110 MVt-ty quraıtyn úsh kún elektr stansasy iske qosyldy. Bul jylyna 117 myń tonna kómirqyshqyl gazymen atmosferanyń lastanýyn boldyrmaýǵa múmkindik beredi. Batys Qazaqstan oblysynda 600 balaǵa arnalǵan 12 balabaqsha ashyldy.
Sondaı-aq ınklıýzıvti bilim berý júıesin jetildirý de jalǵasýda. 1681 balabaqsha men 5536 mektepte erekshe balalarǵa jaǵdaı jasalǵan. Erekshe bilim alýǵa qajettiligi bar balalarmen jumys isteý úshin balabaqshalardyń 2,5 myńnan astam pedagogi jáne mektepterdiń 36 myń muǵalimi biliktilikti arttyrý kýrsynan ótti. Sonymen qatar Nur-Sultan qalasynda, sondaı-aq Pavlodar, Qyzylorda, Batys Qazaqstan, Aqtóbe jáne Aqmola oblystarynda múgedek balalarǵa arnalǵan arnaıy ońaltý ortalyqtary ashyldy.
Eske sala keteıik, Memleket basshysy Qasym-Jomart Toqaev jarııa etken Nur Otan partııasynyń saılaýaldy ýádeleri aıasynda 2025 jylǵa deıin 1 mln otbasy úshin 100 mln sharshy metrden astam turǵyn úı paıdalanýǵa berilip, 3,5 myń aýyl men 5 myń mektepke qaıta jóndeý jumystary júrgiziledi. 25 myń shaqyrym respýblıkalyq jáne 27 myń shaqyrym jergilikti joldardy salý jáne qaıta jańartý josparlanýda.
Áleýmettik tólemderdi jyl saıyn ındeksteýge 3 trıllıonnan astam teńge bólinedi. Densaýlyq saqtaýdy qarjylandyrý kólemi IJО́-niń 5%-yna deıin jetkiziletin bolady. 3 jastan 6 jasqa deıingi balalar mektepke deıingi tárbıemen 100% qamtylatyn bolady.