QR Ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Zulfuhar Joldasov málim etkendeı, Qazaqstanda 17 baǵyttan turatyn ekologııalyq máselelerdi sheshýge arnalǵan jol kartasy ázirlendi, dep habarlaıdy Egemen.kz.
«Mınıstrlik «Halyq únine qulaq asatyn memleket» tujyrymdamasy aıasynda ekologııalyq máselelerdi qoǵammen, ásirese ekobelsendilermen birlesip sheshý jolyn keńinen qarastyrdy. Jurtshylyqpen talqylaý nátıjesinde ákimdik pen basqa da quzyrly organdarmen birlesip ekologııalyq problemalardy sheshýdiń 17 jol kartasy ázirlendi. Onyń aıasynda 485 is-shara qarastyrylǵan. Bıyl sonyń 95-in ótkizý josparlanyp otyr. Bıylǵy jyldyń 1 toqsanynda 70 is-shara ótkizý josparlanyp, onyń 42-si oryndaldy jáne 28 is-shara endi qolǵa alynady», dedi Z.Joldasov OKQ-de ótken brıfıngte.
Onyń aıtýynsha, atalǵan jol kartasy aıasynda jasalǵan jumys 2025 jylǵa qaraı nátıje bere bastaıdy.
«Ekologııalyq problemalardy sheshý jol kartasyn iske asyrý 2025 jylǵa qaraı elimizdegi 10 qala atmosferasynyń lastaný ındeksin joǵary deńgeıden ortasha deńgeıge deıin tómendetýge múmkindik beredi. Sol arqyly iri qalalar aýasynyń jaı-kúıi jaqsara túsedi. Odan bólek, qatty turmystyq qaldyqtarǵa arnalǵan 7 jáne 24 jańa polıgon salý josparymyz bar. Sol sııaqty 12 qatty turmystyq qaldyq polıgony qaıta jańǵyrtylady», dep naqtylady ol.