Armenııa Ázerbaıjan ústinen BUU-daǵy Halyqaralyq sotqa shaǵym túsirdi. Erevan Bakýdy jyldar boıy Armenııa azamattary men etnıkalyq armıandardyń quqyǵyn óreskel buzdy dep aıyptady, dep jazady Egemen.kz Ortalyq Azııa jańalyqtar qyzmetine silteme jasap.
Halyqaralyq sottyń málimetine qaraǵanda, shaǵym ıesi Armenııaǵa «qastyq saıasatyn júrgizgen» Ázerbaıjan «armıandardy násildik turǵyda alalady» dep tujyrymdaǵan.
Erevannyń pikirinshe, sonyń saldarynan «armıandar júıeli túrde dıskrımınasııaǵa ushyraǵan, jappaı azaptalyp óltirilgen, ózge de kemsitýshilikterge ushyraǵan».
Armenııanyń pikirinshe, Bakýdiń «armıan ulty men tegine» qarsy baǵyttalǵan áreketi 2020 jyly qyrkúıekte Taýly Qarabaqta jaǵdaı ýshyqqan kezde qaıta jandanǵan.
Armenııa shaǵymda «qarýly qaqtyǵys kezinde Ázerbaıjan násildik alalaýdyń barlyq túrimen kúres týraly halyqaralyq konvensııa sharttaryn óreskel buzdy» dep aıyptaǵan.
Ázerbaıjan syrtqy ister mınıstrligi ókili Baký «barynsha qorǵanyp», Armenııany dál solaı aıyptap, qarsy shaǵym túsiretinin aıtty.
Taýly Qarabaqtaǵy soǵystan keıin Ázerbaıjan men Armenııa arasyndaǵy jaǵdaı áli ýshyǵyp tur. Byltyr alty aptaǵa sozylǵan soǵys keminde 6900 adamnyń ómirin qıdy. 2020 jyly qarasha aıynda taraptar Máskeýdiń araaǵaıyndyq etýimen atysty toqtatý týraly kelisimge qol qoıdy. Kelisimge sáıkes, Armenııa Taýly Qarabaqtaǵy birneshe aýdandy Ázerbaıjanǵa qaıtarǵan.
Eki el arasyndaǵy atysty toqtatý týraly kelisim jáne Armenııanyń is júzinde soǵysta jeńilýi eldi saıası daǵdarysqa alyp kelgen.