Indýstrııa jáne ınfraqurylymdyq damý mınıstrligi turǵyn úı-kommýnaldyq sharýashylyq salasyndaǵy elektrondy aqparattyq resýrstardy ortalyqtandyrylǵan jınaý jáne saqtaý júıesin tájirıbelik paıdalanýǵa usynyp otyr. Joba «E-Shańyraq» dep atalady.
Joba bytyrańqy aqparattyq júıelerdi biriktirip, turǵyn úı-kommýnaldyq sharýashylyqtyń sıfrlyq júıesine aınalady. Jobanyń birinshi kezeńinde aqparattyq júıe kóppáterli turǵyn úılerdiń sany, olardyń tehnıkalyq jaı-kúıi, úılerdi basqarý organdarynan alynatyn esepke alý aspaptary boıynsha taldamalyq derekterdi qalyptastyrýǵa, sondaı-aq tabıǵı monopolııa sýbektilerimen jáne úıdi basqarýdyń naryqtyq IT-qosymshalarymen (e-PIK, BI clients jáne t.b.) ıntegrasııa júrgizýge múmkindik bermek. Júıe odan ári damı túsedi. Sonyń sheńberinde reıtıngter jasap, basqarýshylar men qyzmet kórsetetin kompanııalardyń tizilimi qalyptasady.
«TKSh QazOrtalyǵy» AQ basqarma tóraǵasy Erbol Tóleýovtiń aıtýynsha, «E-Shańyraq» aqparattyq júıesi – respýblıkanyń barlyq turǵyn úı-kommýnaldyq ınfraqurylymyn sıfrlandyrýǵa múmkindik beretin aýqymdy joba. Júıede jınaqtalǵan derekter salanyń ashyqtyǵyn arttyryp, básekelestik naryqty qalyptastyrady. Joba memleket-jekemenshik áriptestigi tetigi boıynsha bıýdjettik qarjylandyrýsyz iske asyrylady eken.