QR Aýyl sharýashylyǵy mınıstrligi el aýmaǵyna basqa elderden karantınge jatqyzylǵan ónim ákelýdiń 76 faktisi anyqtalǵanyn habarlady, dep jazady Egemen.kz.
«2021 jyldyń 17-24 qyrkúıegi aralyǵynda ósimdikter karantıni jónindegi memlekettik ınspektorlar karantınge jatqyzylǵan ónimdi basqa elderden Qazaqstan Respýblıkasynyń aýmaǵyna ákelý kezinde 76 zań buzýshylyqty anyqtady. Reseı Federasııasynan 595,4 tonna bıdaı, arpa, kartop, qyzanaq, qııar, qyryqqabat, burysh, alma, banan, jańǵaqtar, keptirilgen jemister, 82,5 tekshemetr aǵash, Qyrǵyzstan Respýblıkasynan 43,1 tonna kartop, burysh, tańqýraı, qulpynaı jáne qaraqat, О́zbekstan Respýblıkasynan 17,4 tonna alma, qara órik, qyzylsha, júzim, jońyshqa tuqymdary men gúl kóshetteri, Aýǵanstannan jetkizilgen 20 tonna keptirilgen órik karantındik baqylaý júrgizý kezinde fıtosanıtarııalyq talaptarǵa saı kelmeıtindigin anyqtaldy», delingen vedomstvo habarlamasynda.
О́simdikter karantıni salasyndaǵy zańnamany buzǵan tulǵalar QR ÁQBtK-niń 400-babymen ákimshilik jaýapkershilikke tartylyp, olarǵa jalpy somasy 4,2 mln teńge aıyppul salyndy.
Negizgi zań buzýshylyqtar fıtosanıtarııalyq sertıfıkattyń bolmaýy, taýardyń tańbalanbaýy men karantınge jatqyzylǵan ónimdi qaıtadan teksertpeýge qatysty.
Jyl basynan beri QR Aýyl sharýashylyǵy mınıstrligi Agroónerkásip keshenindegi memlekettik ınspeksııa komıtetiniń ósimdikter karantıni jónindegi ınspektorlary 4 myńǵa jýyq zań buzýshylyqty anyqtap, 308 mln teńgeden astam ákimshilik aıyppul saldy.