О́tken aptada aralas jekpe-jekten Reseıde ótken eki birdeı asa iri halyqaralyq týrnırdi tamashaladyq. Máskeýdegi asa bedeldi ASA dodasynda Asyljan Baqytjanuly, Nursultan Qasymhanov jáne Qarshyǵa Dáýitbek sekildi sportshylarymyz óner kórsetse, Sochıdegi AMC Fight Nights jarysynda Qýat Hamıtov pen Nurbek Qabdrahmanov saıysqa tústi.
Reseıdiń astanasynda uıymdastyrylǵan dodada Qarshyǵa Dáýitbektiń (9-3) asqan sheberligine tánti boldyq. 66 kılo salmaq dárejesinde óner kórsetken ol reseılik Valodııa Aıvazıanmen (10-2) aıqasty. Básekeni qarqyndy bastap, óte joǵary deńgeıde ótkizgen qandasymyz birinshi raýndta qarsylasynyń denesine aýyr soqqysyn darytty. Tynysy tarylǵan Aıvazıan edenge eki búktetilip qulady. Tóreshi dereý jekpe-jekti toqtatty.
О́kinishke qaraı, ózge eki sportshymyz Máskeý tórinde oısyraı utyldy. Jartylaı jeńil salmaqtaǵy Nursultan Qasymhanov (11-3) habarovskilik Alekseı Polpýdnıkovpen (29-8-1) aıqasty. Dál osy sportshy kezinde Arman Ospanovpen úsh márte kezdesip, eki ret san soqtyryp ketken edi. Byltyr Polpýdnıkov úsh ret oktagonǵa shyǵyp, úsh kezdesýde de jeńilis tapty. Biraq bul jarysqa Qıyr Shyǵystyń «Gladıatory» jaqsy babynda kelgen eken. Básekeniń bastalǵanyna 15 sekýnd ótpeı jatyp, ol Qasymhanovty sulatyp saldy.
Jartylaı aýyr salmaqtaǵy Asyljan Baqytjanuly (11-2) Brazılııanyń sańlaǵy Leonardo Sılvamen (17-5) kúsh synasty. «Keskilesken shaıqas» birinshi raýndtan bastaldy. Ekeýi de sheginbeı aıqasyp, bir-birin aýyr soqqylardyń astyna aldy. Sáti kelgende Asyljan qarsylasyn jyǵyp alyp, tómpeshteı bastady. Jany qınalsa da, Leonardo raýndtyń sońyna deıin shydady. Úzilisten keıin jan alysyp, jan berisken aıqas qaıta jalǵasty. Baqytjanuly baryn salǵanymen, brazılııalyqtyń judyryǵy nysanaǵa dóp tıe bastady. Bir mezette Sılvanyń tómennen siltegen soqqysy, ıaǵnı apperkoty qandasymyzdyń ıegine dál tıdi. Asyljan táltirektep baryp qulady. Tóreshi básekeni toqtatqansha Leonardo taǵy bir soqqy jumsap úlgerdi. Nokaýt!
Reseıdiń Sochı qalasyndaǵy AMC Fight Nights týrnırinde qazaqtyń qos sportshysy óz ónerin ortaǵa saldy. Biraq ekeýi de jergilikti sportshylarǵa ese jiberdi. Nurbek Qabdrahmanov (3-1) Magomed Kadıevten (4-1) upaı sanymen utylsa, aıtýly jarystyń basty jekpe-jeginde Qýat Hamıtov (21-6-1) Marıf Pıraevqa (27-4-1) jol berdi. Jalpy, úsh raýndqa sozylǵan bul básekede qos taraptyń óneri kópshilik kóńilinen shyqpady. Úsh raýndqa sozylǵan aıqas barysynda Qýat ta, Marıf te ne bir jaqsy kúrestiń ádisin, ne bir aýyr soqqy jasaı almady. Bir sózben aıtsaq, bul jekpe-jekten áser alarlyqtaı, ne este qalarlyqtaı eshteńe kóre almadyq.