Ustazdar kúni qarsańynda Nursultan Nazarbaev Qory Elbasynyń «El Úmiti» bastamasynyń jobalarynda joǵary nátıjeler kórsetken aýyl mektepterin quttyqtady, dep jazady Egemen.kz.
Birinshi 2 mıllıon teńgeniń qarjylaı sertıfıkaty Qyzylorda oblysynyń Qazaly aýdanynda ornalasqan Erjigit Bozǵulov atyndaǵy №249 mektep-lıseıine tabys etildi. Bul mektep aýyl oqýshylaryna arnalǵan «Myń bala» Ulttyq zııatkerlik olımpıadasynda úzdik nátıje kórsetti. Bilim ordasy jobaǵa qatysqan 4 myńnan astam mekteptiń ishinde úzdikter qatarynda. Olımpıadanyń qorytyndysy boıynsha mektepte 66 fınalıst jáne 21 jeńimpaz anyqtaldy.
«Myń bala» olımpıadasy osymen ekinshi jyl ótkizilip otyr. Osy ýaqyt ishinde jobaǵa 450 myńnan astam aýyl oqýshysy qatysyp úlgerdi. Olımpıada nátıjesi boıynsha 2000 oqýshy, aýyl mektepteriniń 5-6 synyptarynyń jeńimpazdary Respýblıkalyq fızıka-matematıka mektebi, «Bilim-Innovasııa» lıseıleri, «Daryn» mamandandyrylǵan mektepteri sııaqty elimizdiń jetekshi mektepterinde oqýǵa, sondaı-aq Elbasy akademııasynyń «Birge oqý» onlaın mektebinde pándik daıyndyqtan ótýge múmkindik aldy», dep habarlaıdy qordyń baspasóz qyzmeti.
Ekinshi aqshalaı sertıfıkatty Soltústik Qazaqstan oblysy Aqqaıyń aýdanynyń №1 Smırnov orta mektebi aldy. «Elbasy medali» jobasyn iske asyrý sheńberinde neǵurlym belsendi aýyl mektepterine taldaý júrgizilip, atalǵan mektepte Elbasy medaliniń eń kóp ıegeri anyqtaldy. 12 oqýshy baǵdarlamany 7 baǵyt boıynsha aıaqtap, qola medalge ıe bolǵan.
Soltústik Qazaqstan oblysy boıynsha barlyǵy 292 qatysýshy qola medal jeńip aldy. О́ńir boıynsha «Elbasy medali» jobasynyń baǵdarlamasyna 404 jas qatysqan.
Jalpy, eki jyl ishinde «Elbasy medali» jobasyna búkil el boıynsha 20 myńnan astam adam qatysty. Olar: sport, talanttar men daǵdylar, kitap oqý, ulttyq mura, volonterlik, ekspedısııalar men joryqtar, eńbek tájirıbesi syndy jeti baǵytta izdenedi.
Bıyl «Elbasy medaliniń» 605 ıegeri grant alyp, elimizdiń jetekshi joǵary oqý oryndaryna tústi. Olardyń 30%-dan astamy - aýyl mektepteriniń túlegi.
«El Úmiti» bastamasynyń jobasyn uıymdastyrýshylar Nursultan Nazarbaev Qory men «Elbasy Akademııasy» KQ elimizdiń barlyq ustazyn kásibı merekemen quttyqtap, bolashaq urpaqty tárbıeleý jolynda tabys tileıdi», dep jazylǵan habarlamada.