«Barine Bilim» shaǵyn granttar jobasy boıynsha «National Teacher Prize Kazakhstan – «Qazaqstan muǵalimi» ulttyq syılyǵy» qaıyrymdylyq jobasyn iske asyrý aıasynda konkýrstyq komıssııa «Qazaqstan muǵalimi» ulttyq syılyǵyna ótinish bergen 30 muǵalimdi iriktep aldy, dep jazady Egemen.kz.
Azamattyq bastamalardy qoldaý ortalyǵynyń habarlaýynsha, endi árqaısynyń mektebinde 1 mıllıon teńge mólsherinde shaǵyn grant beriledi.
Jobanyń negizi maqsaty – shaǵyn granttar jobasyn iske asyrý arqyly oqýshylardyń jan-jaqty damýy jáne jahandyq azamattyqty damytý, Qazaqstannyń jalpy bilim beretin oqý oryndaryna jaǵdaı jasaý arqyly «Qazaqstan muǵalimi-2021» ulttyq syılyǵyna qatysýshy muǵalimderdi qoldaý jáne olarǵa kómek kórsetý.
Qoǵamdyq mańyzy bar bastamalardy damytý qorynyń tóraǵasy Ermek Majıtovtyń aıtýynsha, shalǵaı jáne aýyldyq jerlerdegi mektep ustazdaryna erekshe kóńil bólinedi.
«Grant qarajatyn bólýdiń astarynda tikeleı aqshalaı syıaqy emes, belgili bir áleýmettik jobalardy biriktirý maqsaty tur. Iаǵnı muǵalim óz mektebin qoldaý úshin uıymdastyrýshylarmen birge qandaı da bir jobaǵa bastamashylyq etedi. Bul syrtqy nemese ishki kógaldandyrý, kitaphany qoryn, muǵalimniń jumys ornyn (kabınetin) jaqsartý bolýy múmkin», dedi ol.
Jeńimpazdar tizimine Almaty, Shyǵys Qazaqstan, Qyzylorda, Soltústik Qazaqstan, Pavlodar, Túrkistan, Atyraý, Batys Qazaqstan, Aqmola, Mańǵystaý, Qaraǵandy jáne Aqtóbe oblystary aýyl mektepteriniń muǵalimderi endi.
Aıta keteıik, jobany Azamattyq bastamalardy qoldaý ortalyǵynyń kómegimen «Natural Energy» qoǵamdyq qory júzege asyryp jatyr.