1 qazan kúni elimizde Qarttar kúni atalyp ótilýde, dep habarlaıdy Egemen.kz.
Halyqaralyq qarttar kúni - 1990 jyly 14 jeltoqsanda BUU Bas assambleıasynda bekitilip, jarııalandy.
Bul mereke elimizde jyl saıyn atalyp ótiledi. Jáne onyń aıasynda qarttarǵa qurmet kórsetilip, túrli formattaǵy is-sharalar uıymdastyrylady.
Atap aıtqanda, qarttarǵa qurmet kórsetý aksııalary, memleket tarapynan birjolǵy qarjylaı kómek, sondaı-aq, azyq-túlik sebeti, shıpajaılarǵa joldama jáne taǵy basqa. Sol sekildi, egde jastaǵy jandarǵa arnalyp merekelik konsert te uıymdastyrylady.
Odan bólek, qarttarǵa arnalǵan aýqymdy sharanyń biri «Belsendi uzaq ómir» ulttyq jobasy.
QR Eńbek jáne halyqty áleýmettik qorǵaý mınıstrligi byltyr qolǵa alǵan joba aıasynda elimizdiń barlyq óńirlerinde belsendi uzaq ómir súrý ortalyqtaryn ashý josparlanǵan. Josparǵa saı onda egde jastaǵy jandar bos ýaqytyn ótkize alady. Atalǵan ortalyqta aǵylshyn tilin úırený, kompıýterlik saýattylyq kýrstarynan ótý, emdik dene shynyqtyrý, bı jáne taǵy basqa sharalardy ótkizý qarastyrylǵan.
Eńbek jáne halyqty áleýmettik qorǵaý mınıstrligi bergen statıstıkaǵa súıensek, búginde elimizde 2 mln 236 myń qart jan (zeınet jasyndaǵy) bar. Aıta keteıik, atalǵan mereke qarsańynda bıyl elordada 84 867 zeınetkerge áleýmettik kómek kórsetiletini habarlandy.
Qala ákimdigi usynǵan málimetke sáıkes, qarjylaı kómekten bólek, volonterlerdiń qatysýymen qarttar kúnine oraı konserttik baǵdarlamalar, qoǵamdyq oryndarda gúlder taratý, qarttar úıinde senbilik jáne zeınetkerlerge ekskýrsııa ótkizý josparlanyp otyr. Jáne atalǵan is-sharalar 3 qazanǵa deıin jalǵasady. Sonymen qatar, elorda ákimdigi qarttar kúnine oraı ótetin barlyq is-sharalarda sanıtarlyq talaptardyń tolyqtaı saqtalatynyn jetkizdi.