Qarapaıym aýyl agronomyna maqta teretin kombaın júrgizýshileriniń qajetti bólshekti kórshi elden alyp júrgeni oı salsa kerek. Zerdeleı kele kombaındarǵa asa qajetti «shpındeldi shetkany» aýyl aspaı-aq shyǵarýǵa bolatynyna kóz jetkizedi. Sóıtip plastıkalyq qaldyqtardan, jalpaq tilmen aıtqanda bosaǵan baklashkalardan álgi bólshekti jasap shyǵarady.
Búginde Jetisaı aýdanyna qarasty Jyly sý aýyldyq okrýginiń turǵyny Qozybaı Áshekovtiń ónimi suranysqa ıe. Aýyl sharýashylyǵy salasyndaǵy bilimin bıznespen ushtastyrǵan agronom uly Altaımen birge plastıkalyq qaldyqtardan «shpındeldi shetka» men qalyńdyǵy 1 mm bolatyn jip shyǵarýda. Buǵan deıin atalǵan shetkany kórshiles О́zbekstan elinen tapsyryspen alyp kelgen kombaın júrgizýshileri aýyl azamatynyń qolynan shyqqan ónim sapasynyń joǵary, baǵasynyń arzan ekenin aıtady. Bir kombaınǵa 96 dana ketetin bir maýsymǵa jaramdy ózbekstandyq shetkanyń ár danasy bazar naryǵynda 4 myń teńge bolsa, Qozybaı Áshekovtiń qolynan shyqqan eki maýsymǵa jaramdy ónimniń baǵasy sonyń teń jartysy, ıaǵnı 2 myń teńge turady. Osylaısha, otbasylyq bıznesti damytyp otyrǵan Qozybaı Ábdirashımuly qolynan is keletin aýyldyń taǵy bir turǵynyn jumyspen qamtyp otyr. Qoldaǵy barymen kásip ashqan azamat aldaǵy ýaqytta memlekettik qoldaýmen nesıe alýǵa nıetti.
«Memleketimizdiń júıeli saıasatynyń nátıjesinde jyl saıyn kásipkerlerge jasalatyn memlekettik qamqorlyqtardyń qatary artyp, beriletin nesıelerdiń kólemi de kóbeıip keledi. Biz de sol baǵdarlamalarǵa qatysyp, jeńildetilgen paıyzben nesıe alýdy, aldaǵy ýaqytta kásibimizdi keńeıtsek, ónim kólemin arttyrsaq degen jospardamyz», deıdi Q.Áshekov.
Búginde kásipker kúnine 25 danaǵa deıin shpındeldi shetka jasaýda. О́tken jyly 28, bıyl 40-qa tarta kombaınǵa ónim daıyndaǵan azamattar tapsyrystyń kún sanap artyp otyrǵanyn aıtady. Sondaı-aq Q.Áshekovtiń otbasy jylyjaı, baý-baqsha ósirý isin de durys jolǵa qoıyp, aýyl turǵyndaryn jyl boıy kókónispen qamtamasyz etip keledi.