Qazaqstan Respýblıkasy Premer-Mınıstriniń orynbasary Eraly Toǵjanov «Serpin» baǵdarlamasyn iske asyrýdyń aralyq nátıjeleri týraly aıtty, dep jazady Egemen.kz.
«2020 jyly «Serpin» jobasy boıynsha 2653 adam joǵary jáne joǵary oqý ornynan keıingi bilim berý mekemelerinde oqýyn aıaqtady. «Serpin» baǵdarlamasyn iske asyrý nátıjesinde 2018 jyldan 2021 jylǵa deıin 7707 adam oqýdy aıaqtady, onyń ishinde 5526 adam jumysqa ornalastyryldy (71,7%). 2018-2019 oqý jylyna 931 adam oqý bitirdi, onyń ishinde 875 adam jumysqa ornalastyryldy (93,9%). 2019-2020 oqý jylyna 4123 adam bitirdi, onyń ishinde 3238 adam jumysqa ornalastyryldy (78,5%). 2020-2021 oqý jylynda 2653 adam oqýyn aıaqtady, onyń ishinde 1413 adam (53,2%) jumysqa ornalastyryldy», dedi Eraly Toǵjanov depýtattyq saýalǵa.
Onyń aıtýynsha, joba túlekterin odan ári jumysqa ornalastyrý boıynsha tıisti jumystar júrip jatyr.
«Kadrlardy daıarlaý pedagogıkalyq, tehnıkalyq jáne aýyl sharýashylyǵy mamandyqtary boıynsha júrgiziledi. Jobaǵa qatysýshylardy qabyldaý kvotasy memlekettik bilim berý tapsyrysynyń jalpy kóleminiń 10% quraıdy. 2021-2024 jyldarǵa JOO bazasynda «Serpin» baǵdarlamasy boıynsha kadrlar daıarlaýǵa 20624 grant kóleminde memlekettik tapsyrys bekitildi», dedi vıse-premer.
«Sonymen qatar «Nur Otan» partııasynyń saılaýaldy baǵdarlamasyn iske asyrý aıasynda «Serpin» baǵdarlamasy boıynsha memlekettik tapsyrys 2025 jylǵa qaraı pedagogıkalyq mamandyqtar boıynsha taǵy 2000 grant beriledi», dep tolyqtyrdy E.Toǵjanov.