Qazaqstan Respýblıkasy Parlamenti Senatynyń Tóraǵasy – Álemdik jáne dástúrli dinder lıderleri Sezi Hatshylyǵynyń Basshysy Máýlen Áshimbaev belgili dinı qaıratkerlermen kezdesti, dep habarlaıdy Egemen.kz Senattyń baspasóz qyzmetine silteme jasap.
Kezdesýler barysynda Senat Spıkeri Qazaqstanda ultaralyq jáne konfessııaaralyq tózimdilik, sondaı-aq, ózara túsinistik pen dıalog elimizdegi qoǵamdyq kelisimdi saqtaýdyń asa mańyzdy sharty sanalatynyn atap ótti.
«Elimizde 18 din men konfessııany ustanatyn 100-den astam etnıkalyq top ókilderi beıbit ómir súrýde. Etnosaralyq beıbitshilik pen kelisim, ózge dinı kózqarastarǵa degen qurmet qazaqstandyq mádenıet pen mentalıtettiń ajyramas bóligine aınaldy», dedi Máýlen Áshimbaev.
Kavkaz Musylmandary Basqarmasynyń Tóraǵasy Sheıh-Ýl-Islam Allashúkir Pasha-Zademen suhbat kezinde taraptar dinaralyq dıalog ıdeıalaryn jahandyq deńgeıde ilgeriletýde Álemdik jáne dástúrli dinder lıderleriniń Sezi men Baký din lıderleri forýmynyń mańyzy zor ekenin aıtty. Sondaı-aq olar bul eki alańnyń yntymaqtastyǵyn nyǵaıtý máselelerin talqylady.
Anglıkan shirkeýiniń ókili, Dorkıng qalasynyń epıskopy Djo Beılı Ýellspen kezdesý kezinde Máýlen Áshimbaev Forýmnyń geografııasy men konfessııalyq ókildigin keńeıtý boıynsha atqarylyp jatqan jumystarǵa nazar aýdardy. Suhbat barysynda eki tarap Hatshylyqtyń HIH otyrysynda qabyldanatyn sheshimder Álemdik jáne dástúrli dinder lıderleriniń VII Sezin jańa deńgeıge kóteretinine senim bildirdi.
Aıta keteıik, atalǵan kezdesýler erteń Nur-Sultan qalasynda ótetin Álemdik jáne dástúrli dinder lıderleri Sezi Hatshylyǵynyń HIH otyrysy aıasynda uıymdastyryldy.