Aıdyń-kúnniń amanynda Taıynsha aýdanynyń Dmıtrıevka aýylynyń 31 jastaǵy turǵyny joǵalyp ketken. Polısııaǵa ulyn taýyp berýdi ótinip shaǵynǵan anasy jigittiń 29 qyrkúıekte úıinen óziniń mashınasyna minip ketip, sodan bergi úsh kúnde oralmaǵanyn aıtqan. Bul arada jigittiń ne sebepti úıinen ketip qalǵany aıtylmaıdy. Biraq onyń ashýmen ketkeni anyq. О́ıtkeni ashýmen ketpegen adam anasyna jónin aıtsa nemese úsh kúnnen beri bir habaryn berse kerek edi.
Krımınaldyq polısııa basqarmasy izdeý jumystaryna Taıynsha, Esil, Qyzyljar, sondaı-aq oblystyq polısııa apparatynyń qyzmetkerlerin tartady. Barlyq polısııa bólinisterine baǵdarlar jiberilip, eriktiler men qoǵamdyq birlestikterdiń ókilderi áleýmettik jelilerde iz-tússiz joǵalǵan adamnyń sýretteri men belgileri bar jazbalar ornalastyrady.
Izdegen jandardyń báriniń oıynda joǵalǵan adamnyń óli-tirisin bilý ǵana bolǵan. Aqyry... aldymen joǵalǵannyń kóligi tabylady. Jergilikti turǵyndardyń biri polısııaǵa Toranǵul men Iversk aýyldarynyń arasyndaǵy qara jolda qaraýsyz qalǵan «VAZ» avtokóligin kórgenin aıtady. Eski kóliktiń shamasy ıesin osy jerge deıin ákelýge ǵana jetse kerek.
Sodan keıin osy tóńirektegi barlyq orman men egis dalasy túgel súzilgen. Oǵan qyzmettik-izdestirý ıtteri, sondaı-aq kvadrokopter ushý apparaty da tartylǵan. Nátıjesinde, jigit qalyń ormannyń ishinde 29 qyrkúıekten 2 qazanǵa deıin alasa jerkepe turǵyzyp alyp, túnep júrgeni belgili bolady. Onyń densaýlyǵyna zııan kelmegen, alaıda psıhologııalyq aýytqýshylyǵy bary kórinip turǵan. Osy kúnderi ol tek almamen qorektengenin aıtqan. Sóıtip, HHI ǵasyrdyń Robınzony aman tabylyp, týystaryna qaıtaryldy. Qazir onyń úıden ketý sebepteri anyqtalýda.
Jyl basynan beri Soltústikte osyndaı bolmasa da basqa sebeptermen habar-osharsyz ketkender týraly aıtylǵan 323 ótinish túsken. Joǵalǵan jandardyń 318-i búginge deıin tabylǵan.