Tennısten AQSh-tyń Indıan-Ýells qalasynda jyl saıyn dástúrli túrde ótip turatyn asa iri halyqaralyq týrnırdiń shymyldyǵy túrildi. Ádettegideı bul jarysta kil myqtylar ǵana óner kórsetedi. Al ortańqol oıynshylar baq synaǵysy kelse, onda olarǵa irikteý týrnırine qatysýǵa týra keledi. Sol synaqtan súrinbeı ótkender ǵana úzdiktermen kúsh synasý múmkindigine ıe bolady.
О́zgelerdi aıtpaǵanda, ataǵy alysqa jaıylǵan tennısshilerdiń ózderi «Masters» sanatyna jatatyn aıtýly týrnırde óner kórsetýdi úlken mártebe sanaıdy. Sebebi osy básekelerge qatysý arqyly oıynshylar álemdik reıtıngte joǵarylap qana qoımaı, materıaldyq jaǵdaılaryn jaqsarta túsedi. Máselen, bıyl Indıan-Ýellstegi jarystyń júlde qory
8 359 455 AQSh dollaryn qurap otyr. Tarqatyp aıtsaq, erler men áıelder arasyndaǵy bas júlde ıegerleriniń árqaısysy
1 209 730 dollardan alady. Aqtyq saıysta jeńilis tapqandar sol somanyń teń jartysyn ıelenedi. Jartylaı fınalǵa jetseńiz esepshotyńyzǵa 335 myń dollar aýdarylady. Shırek fınalǵa shyqqandar 175 myń dollardy enshileıdi. Tórtinshi jáne úshinshi kezeńge jetken oıynshylarǵa da tıesili aqsha az emes. Olarǵa shamamen 92 myń jáne 52 myń dollar beriledi. Tipti osy dodada boı kórsetip, alǵashqy aınalymnan asa almaǵan jaǵdaıdyń ózinde 18 155 dollardy qaltaǵa basasyz.
Jer-jahandy jaılaǵan pandemııanyń saldarynan byltyr bul jarys ótpeı qaldy. Al 2019 jyly uıymdastyrylǵan dodada erler arasynda aýstrııalyq Domınık Tım aldyna jan salmady. Fınalda ol dańqty Rodjer Federerdiń ózin 3:6, 6:3, 7:5 esebimen san soqtyrdy. Áıelder saıysynda bas júlde úshin tartys germanııalyq Anjelıka Kerber men kanadalyq Bıanka Andreeský arasynda órbidi. Bul báseke 6:4, 3:6, 6:4 esebimen Úıeńki japyraqtar elinen kelgen qyzdyń paıdasyna sheshildi.
Bıylǵy jarysqa túrli sebepterge baılanysty «uly úshtik» degen teńeý taǵylǵan Novak Djokovıch, Rafael Nadal jáne Rodjer Federer syndy sańlaqtar qatyspaıdy. Osynyń aldyndaǵy jeńimpaz Domınık Tım de boı kórsetpeıtin boldy. Biraq odan jarystyń qyzyǵy esh kemip qalmaıtyny anyq. Sebebi kortqa shyǵatyndar qatarynda basqa da juldyzdar jetip artylady. Olardyń barlyǵy da Indıan-Ýellste barymyzdy salamyz dep qulshynyp otyr.
Týrnırdiń alǵashqy kúni Qazaqstannyń eki tennısshisi kortqa shyqty. Iýlııa Pýtınseva germanııalyq Andrea Petkovıchten basym tústi – 7:6, 6:1. Keshe Zarına Dıas japonııalyq Nao Hıbınomen saıyssa, Elena Rybakına reıtınginiń joǵarylyǵyna baılanysty jarysty ekinshi kezeńnen bastaıdy. Al Mıhaıl Kýkýshkın irikteý synynyń fınalynda amerıkalyq Ernesto Eskobedodan utylyp qaldy – 2:6, 4:6.