Búgin Atyraý oblysynda Kaspıı teńiziniń jaǵalaýyndaǵy qamys órtin sóndirý qaıta jalǵasty, dep habarlaıdy Egemen.kz.
Kaspıı teńiziniń jaǵalaýyndaǵy qamys 5 qazannan beri órtenip jatyr. Qamys órtin sóndirý úshin 7 qazanda «MI-8» (AMT) VSÝ-5 sý aǵyzý qurylǵysy bar tikushaǵymen áýeden barlaý júrgizildi. Barlaý kezinde qamys órtiniń eki frontaldy oshaǵy anyqtaldy. О́rtti sóndirý úshin Qurmanǵazy aýdandyq tótenshe jaǵdaılar bólimi men №7 órt sóndirý bóliminiń jeke quramynan 11 qyzmetker, qosymsha kúshter men quraldar tartyldy.
«Jeke quramnyń qyzmetkerleri 7 qazanda saǵat 12:30-dan saǵat 17:30-ǵa deıin 12 gektar aýmaqtyń órtin óshirdi. Al, 8 qazanda Kaspıı teńiziniń jaǵalaýynda janyp jatqan órt oshaqtaryn sóndirý jumystaryna oblystyq tótenshe jaǵdaılar departamentiniń 23 qyzmetkeri, 4 birlik tehnıka, 4 motosorǵysh jumyldyryldy. Janý oshaǵyna jaqyn ornalasqan sý kózin izdeý maqsatynda «Qazavıaqutqarý» AQ batys óńirlik fılıalynyń «MI-871» tikushaǵy saǵat 12:12-de áýege kóterilip, 5 shaqyrym qashyqta ornalasqan sý qoımasyn anyqtady. Sý qoımasynan sý tasý arqyly «MI-871» tikushaǵy VSÝ-5 sý aǵyzý qurylǵysymen janý oshaqtaryna áýeden 30 tonna sý tógildi. О́rttiń jalpy aýmaǵy 150 gektardy qurady. Jalyn sharpyǵan 50 gektar aýmaqtaǵy órt sóndirildi» dep habarlady oblystyq tótenshe jaǵdaılar departamentiniń baspasóz qyzmeti.