Koronavırýs ınfeksııasynyń taralýy báseńdegen Shymkent qalasy «jasyl aımaqqa» ótti. Onyń basty sebebiniń biri retinde ekpe egýdegi belsendilik atalýda. Búginde úshinshi megapolıste vaksınalaýǵa jatatyn 536 myń azamattyń barlyǵy indetke qarsy ekpeniń I komponentin saldyrǵan. Al II komponentin 454 848 adam alǵan.
Shymkentte indettiń taralýy azaıyp, ınfeksııalyq stasıonardaǵy tósektik oryndardyń basym bóligi qysqartyldy. Mamandardyń aıtýynsha, bul – ımmýndaý sharasynyń nátıjesi. Densaýlyq saqtaý basqarmasy úshinshi megapolıs koronavırýsqa qarsy vaksına saldyrý boıynsha bastapqy jospar 100 paıyzǵa oryndalǵanyn habarlady. «Jasyl aımaqqa» kirgen Shymkentte ótken táýlikte, ıaǵnı 10 qazanda koronavırýstyń 28 jaǵdaıy tirkeldi. Onyń ishinde 8 adam ınfeksııalyq stasıonarǵa jatqyzylyp, 20 adam úı baqylaýyna alyndy. Dárigerlerdiń kómegimen indetten aıyǵyp, otbasyna oralyp jatqandar qatary da arta túsýde. Mysaly, COVID-19 ınfeksııasyna shaldyǵyp, ókpesiniń 62 paıyzy zaqymdalyp aýrýhanaǵa túsken 72 jastaǵy ájeı qaýipti ınfeksııany jeńip shyqty. Naýqasty dárigerler bir aıǵa jýyq hattama boıynsha emdegen. Qala turǵyny Sharapat Myrzalıeva óte aýyr halde 14-qyrkúıek kúni qalalyq juqpaly aýrýlar ortalyǵyna kelip túsken. Kelgen kezdegi jaǵdaıy boıynsha qandaǵy ottegi mólsheri, ıaǵnı satýrasııasy 50-den tómen bolǵan. Dárigerler naýqasty jasandy tynys alý apparatyna qosyp, shuǵyl emdik sharalaryn júrgizdi. Qart kisiniń arterııalyq qan qysymy jáne asqazan men baýyrda qosalqy aýrýlary bolǵan. «Túsken kezde jaǵdaıy óte aýyr boldy. Kompıýterlik tomografııamen tekserý nátıjesinde naýqastyń ókpesi 62 paıyz zaqymdalǵany anyqtaldy. Naýqasqa hattama boıynsha tolyq em kórsetildi. Qazirgi jaǵdaıy jaqsy. О́zdiginen dem alýda. Qandaǵy ottegi mólsheri ornyna keldi. Apa tolyq emdelip, úıine oraldy», deıdi dáriger Beken Syrbekuly.
Dárigerler indet juqtyrǵandardyń azaıýyna, dál dıagnoz qoıýǵa jáne naýqastarǵa sapaly kómek kórsetýge zamanaýı jabdyqtardyń septigi mol ekenin aıtady. Osy oraıda jýyrda «Ulttyq saraptama ortalyǵy» MK men Izraıldiń AID Genomics halyqaralyq genomdyq kompanııasy arasyndaǵy kelisim sheńberinde Shymkentte koronavırýs ınfeksııasyn dıagnostıkalaýǵa arnalǵan zerthanalyq keshen ashylǵanyn aıta ketelik. AID Genomics juqpaly aýrýlardy dıagnostıkalaýǵa mamandandyrylǵan jetekshi dıagnostıkalyq kompanııa yntymaqtastyq aıasynda koronavırýs ınfeksııasyn zertteý jabdyqtary boıynsha gýmanıtarlyq kómek kórsetti. Zerthanalyq jabdyq táýligine 2 500-ge deıin test oryndaýǵa qabiletti, ónimdiligi joǵary tolyq avtomattandyrylǵan keshen. Zerthanamen birge nátıjelerdi qalyptastyrý, prosesti monıtorıngteý jáne jedeldetý úshin jasandy ıntellekt tehnologııasy qoldanylatyn jeke ázirlengen qamtamasyz etý baǵdarlamasy paıdalanýǵa berildi. Sala mamandary Qazaqstannyń Izraıldegi elshiliginiń qoldaýymen júzege asyrylǵan bul bastama adam faktorynyń áserin barynsha azaıtyp, nátıjelerdiń dáldigin qamtamasyz etetinin aıtýda.