О́tken demalys kúni AQSh-tyń Las-Vegas qalasynda ornalasqan T-Mobile arenasynda asa aýyr salmaqtaǵy WBC belbeýiniń ıegeri, 33 jastaǵy brıtanııalyq boksshy Taıson Fıýrı (32-0-1, 22 KO) men álemniń eks-chempıony (WBC), 35 jastaǵy amerıkalyq Deonteı Ýaılder (42-2-1, 41 KO) úshinshi revansh jekpe-jegin ótkizdi.
Aýyr salmaqtaǵy alyptar arasyndaǵy alǵashqy aıqas 2018 jyldyń 1 jeltoqsanynda AQSh-tyń Los-Andjeles qalasyndaǵy Staples Center sport kesheninde ótti. 12 raýndqa sozylǵan bul jekpe-jekte Fıýrı eki ret nokdaýnǵa tússe de, qaptaldaǵy tóreshilerdiń esebi boıynsha kezdesý 111-115, 114-110, 113-113 esebimen teń aıaqtaldy. Birinshi kezdesýdiń birinshi jartysynda brıtanııalyq boksshy qarsylasyna qaraǵanda barlyq jaǵynan ústemdik tanytty. Al Ýaılder tek bir soqqy úshin jumys istedi. Sóıtip, amerıkalyq boksshy 9-raýndta óz degenine jetti. Deonteıdiń oń qolymen jasaǵan aýyr soqqysy Fıýrıdi eseńgiretip tastady. Nokdaýn! Keıinnen Ýaılder 12-raýndta oń qolymen tikeleı, sol qolymen jaqtan urǵan serııaly soqqysymen qarsylasyn taǵy da nokdaýnǵa túsirdi. Soǵan qaramastan tóreshiler bul aıqasta basymdyqqa ıe bolǵan jeńimpaz boksshyny kóre almapty.
Sóıtip eki boksshy araǵa 14 aı salyp kim myqtyny anyqtaıtyn ekinshi jekpe-jek ótkizýge kelisti. Las-Vegastaǵy (AQSh) MGM Grand Garden Arena-da ótken revanshta Taıson Fıýrı aıqyn basymdyq tanytyp, qarsylasynan 7-raýndta tehnıkalyq nokaýtpen basym tústi. Ýaılderdiń bapkeri 7-raýndta sharshy alańǵa aq súlgi laqtyryp, shákirtiniń jeńilgenin erte moıyndady. Bul raýndqa deıin amerıkalyq boksshy 3 jáne 5-raýndta nokdaýnǵa túsken bolatyn. Sóıtip, ekinshi jekpe-jek Fıýrıdiń jeńisimen aıaqtaldy. Deonteı bul jeńilisin kezdesý aldynda kıip shyqqan kıiminiń aýyr bolýymen, fızıkalyq turǵyda sharshap qalǵanymen baılanystyryp edi.
Kúni keshe aıaqtalǵan trılogııa 11-raýndta Taıson Fıýrıdiń oryndaýyndaǵy ádemi nokaýtpen aıaqtaldy. Deonteı bul jekpe-jekke jańa jattyqtyrýshymen daıyndalsa da, jeńiske jete almady. Burynǵy bapkeri Mark Brılandpen ekinshi aıqasta oramal laqtyrǵany úshin jumys isteýden bas tartqan edi. Sóıtip, ony úshinshi jekpe-jekke burynǵy aýyr salmaqtaǵy boksshy Malık Skott daıyndady. Bir qyzyǵy, Ýaılder Skotty 2014 jyly birinshi raýndta-aq nokaýtpen jeńgen edi.
Trılogııaǵa jańa bapkermen daıyndalǵan Deonteı Ýaılder kezdesýdi táýir bastaǵan edi. Biraq úshinshi raýndqa kelgende qarsylasynyń aýyr soqqysyn ótkizip alyp, nokdaýnǵa túsip qaldy. Tez es jıyp úlgergen amerıkalyq boksshy tórtinshi raýndta Taıson Fıýrıdiń ózin eki ret nokdaýnǵa jiberdi. Osydan keıin eki boksshy da óte saqtyqpen judyryqtasty. Biraq raýnd ótken saıyn amerıkalyq boksshynyń kúshi sarqylyp, brıtanııalyqtyń ekinshi tynysy ashyla bastady. Jekpe-jekti tolyq óz qolyna alǵan Fıýrı qarsylasyn 11-raýndta aýyr nokaýtqa túsirip, barlyǵyna núkte qoıdy.
Osylaısha, Taıson Fıýrı 32-shi jekpe-jegin ótkizip, 31-shi jeńisine qol jetkizdi. Onyń 22-sin nokaýtpen aıaqtasa, bir márte teń tústi. Al Deonteı Ýaılder 45-shi márte sharshy alańǵa kóterilip, 41 kezdesýinde jeńiske jetken. Bir ret teń nátıje kórsetip, eki ret jeńilistiń kermek dámin tatty. Ekeýinde de dál osy Fıýrıden jeńildi.