Saýd Arabııasynyń Jıdda qalasynda aýyr atletıkadan jastar arasynda ótken álem chempıonatyna Qazaqstannan nebári eki sportshy ǵana qatysqany málim. Olardyń ekeýi de asqan sheberlik tanytyp, altyn tuǵyrdan kórindi.
Jarys jolyna 102 kg salmaq dárejesinde kúsh synasyp júrgen Rahat Bekbolat shyqqanda onyń bas júldeni oljalaıtynyna kúmándanǵandar kemde-kem edi. Sebebi ol buǵan deıin de jasóspirimder men jastar arasynda álem jáne qurlyq chempıony atanyp, san ret rekordtyq kórsetkishti jańartty. Syr boıynyń jas sańlaǵy eresekter dýyna da erkin qosylyp, birqatar dúbirli dodada myqtylyǵyn moıyndatty.
R.Bekbolat Jıddadaǵy jarysta da jasyndaı jarqyldady. Qossaıystyń qorytyndysy boıynsha 355 (155+200) kg ziltemirdi erkin eńsergen ol bas júldeni qanjyǵasyna baılady. Kúmis medaldy ıelengen Túrkııanyń tastúlegi Taner Chaglar qandasymyzdan 18 kg kem kóterdi. Qola júlde Irak sportshysy Ammar Rýbaıavı Alıge buıyrdy.
Sondaı-aq keshe Rýfına Shalqarovanyń da asqan sheberligine tánti boldyq. +81 kg salmaqta synǵa túsken ol 247 (107+140) kg kórsetkishpen altynnan alqa taqty. О́zge ziltemirshiler qazaq qyzyna jarytyp qarsylyq ta kórsete almady. Máselen, ekinshi orynǵa taban tiregen brazılııalyq Tıana Jýstıno Rýfınadan 28 kg kem kóterdi. Úshinshi satyǵa túrkııalyq Fatmagúl Chevık jaıǵasty. Onyń kórsetkishi – 203 kg.