QR Ishki ister mınıstrliginde mınıstr Erlan Turǵymbaevtyń basshylyǵymen alqa otyrysy ótti, dep habarlaıdy Egemen.kz mınıstrlikke silteme jasap.
Jıyn barysynda qurylymdyq bólinister men vedomstvolardyń basshylary QR Prezıdenti Qasym-Jomart Toqaevtyń tapsyrmalaryn oryndaý barysy jáne ishki ister organdarynyń 9 aı ishinde atqarylǵan jedel-qyzmettik jumysynyń qorytyndylary týraly baıandady.
Otyrysta jumystyń «servıstik modeline» kóshý, polısııa qyzmetteriniń ashyqtyǵyn, aıqyndyǵyn jáne qoljetimdiligin qamtamasyz etý, sondaı-aq halyqpen «keri baılanys ornatý» máseleleri keńinen qaraldy.
Erlan Turǵymbaev «jurtqa jaqyn polısııa» qaǵıdatyn iske asyrýdyń, qoǵamdyq tártipti saqtaý úshin modýldik beketter men ýchaskelik pýnktter jelisin damytýdyń mańyzdylyǵyn atap ótti. Qabyldanǵan sharalardyń nátıjesinde aýyr qylmystar, densaýlyqqa aýyr zııan keltirý, qaraqshylyq, tonaý, zorlaý, urlyq, mal urlyǵy, buzaqylyq sanynyń azaıýyna qol jetkizildi. Oń úrdisterdiń ishinde kámeletke tolmaǵandar arasyndaǵy quqyq buzýshylyqtar 30 %-ǵa, mas kúıinde quqyq buzýshylyq jasaý 21 %-ǵa, qoǵamdyq oryndar men kóshelerde oryn alǵan quqyq buzýshylyqtardyń úshten birge azaıdy.
Birqatar óńirlerde otbasylyq-turmystyq qylmys aıtarlyqtaı tómendedi. Mınıstr ınternet-alaıaqtyq sanynyń ósýine de nazar aýdardy. Azamattardyń senimderin paıdalana otyryp, qylmyskerler aldaýdyń ártúrli tásilderin qoldanady. Kóbinese urlanǵan qarajat shetelge elektrondyq tólem júıeleri arqyly shyǵarylady.
«Osyǵan baılanysty QR IIM TMD-ǵa qatysýshy memleketterdiń Ishki ister mınıstrleri keńesiniń otyrysynda elden tys, shektes memleketter aýmaǵynda jasalatyn osyndaı qylmystarǵa qarsy is-qımyl tetigin birlesip ázirleý týraly bastama jasady. Alaıaqtyq is-áreketter men túrli qarjy pıramıdalarynyń qyzmetiniń kesirinen azamattarǵa aıtarlyqtaı materıaldyq zııan keltiriledi, bul shuǵyl sharalardy talap etedi», dedi vedomstvo basshysy.
Esirtki qylmysyna qarsy kúres jónindegi jumys jeke qaraldy. Esirtki quraldaryn ǵalamtor arqyly jarnamalaý jáne taratý úshin jaýapkershilik kúsheıtildi. Zańsyz aınalymǵa jedel den qoıý jáne ony boldyrmaý úshin esirtkiniń jańa túrlerine tyıym salynady, esirtkiniń qylmystyq jaýaptylyq týyndaıtyn «krımınaldyq salmaǵy» tómendetiledi.
Jol qaýipsizdigin qamtamasyz etý máselesi de kún tártibine qoıyldy. Jol apattarynyń negizgi sebebi - júrgizýshilerdiń jol qaýipsizdigin saqtamaýy. Sondaı-aq, jaıaý júrginshilerdiń tártibi men qaýipsizdigi máselesine erekshe nazar aýdarý qajet. Sebebi jalpy JKO-nyń, onyń ishinde ólimmen aıaqtalǵan jáne kóp adam jaraqattanǵan JKO sanynyń ósýi baıqaldy. Osyǵan baılanysty Erlan Turǵymbaev joldardaǵy qaýipsizdikti baqylaýdy kúsheıtýdi, kóshe-jol jelisine tekserý júrgizýdi, jol-paıdalaný qyzmetteriniń buzýshylyqtardy joıýdy uıymdastyrýdy, jol ınfraqurylymyna jaýapty memlekettik organdarmen ózara is-qımyldy jandandyrýdy tapsyrdy.
Sonymen qatar, mınıstr beınebaqylaý júıesin keńeıtý, jol qozǵalysy erejelerin buzýdy avtomatty túrde tirkeý júıesin belsendi qoldaný jáne atalǵan buzýshylyqtar úshin jazalaýdyń bultartpastyǵy qaǵıdatyn basym baǵyt dep atady. Birinshi kezektegi mindetterdiń biri - jeke quram arasynda zańdylyq pen tártipti saqtaý, kadr saıasatyn jetildirý, qoǵam men halyqtyń seniminen shyǵatyn polıseıdiń «jańa formatyn» qurý.