BUU Soltústik Koreıada fızıkalyq jaǵynan álsiz adamdardyń ólimine ákeletin ashtyq máselesi bar ekenin málimdedi, dep habarlaıdy Egemen.kz.
Bul týraly BUU-nyń Seýldegi adam quqyqtary jónindegi keńsesiniń saıty jazady.
BUU-nyń adam quqyqtary jónindegi arnaıy ókili Tomas Oea Kıntana óz baıandamasynda «álsiz balalar men qarttar» ashtyq qaýpine kóbirek ushyraıtynyn aıtty. Soltústik Koreıa pandemııaǵa baılanysty búkil álemnen odan saıyn oqshaýlana tústi.
«Úkimettiń pandemııaǵa qarsy shekteýleri men qyraǵylyǵy adam ómirine qaýip tóndiretin osy máseleniń aldyn alýǵa kómektesti. Biraq uzaq ýaqyt oqshaýlaý men shekaranyń jabylýy azyq-túlik pen basqa da densaýlyq problemalaryna, turǵyndardyń ekonomıkalyq jaǵynan qıyndyq kórýine sebep boldy», delingen arnaıy ókildiń esebinde.
Ol BUU Qaýipsizdik Keńesin osy elge gýmanıtarlyq kómek jetkizýdi jeńildetý úshin KHDR-ǵa qarsy sanksııalardy qaıta qaraýǵa jáne olardy álsiretýge shaqyrdy. Shekteýler Soltústik Koreıa men Qytaı arasyndaǵy saýda-sattyqty is júzinde joıdy. BUU málimetteri boıynsha, bıyl tamyzda shekaralyq taýar aınalymy tek 28,8 mıllıon dollar bolǵan, bul eki jyl burynǵy kórsetkishtiń segizden bir bóliginen az. BUU-nyń azyq-túlik baǵdarlamasy úsh aı buryn 860 myń tonna kóleminde azyq-túlik tapshylyǵyn jarııalaǵan.Eske salaıyq, Soltústik Koreıa ıadrolyq jáne zymyrandyq baǵdarlamalardy damytýǵa baılanysty BUU men AQSh sanksııalaryna jatady. BUU Qytaımen shekarada kommersııalyq qyzmet jasaıtyn soltústik koreıalyqtar kiristerin joǵaltqanyn atap ótti.