QR Premer-mınıstri Asqar Mamın sý resýrstaryn basqarý jónindegi jeke Memlekettik organ qurý múmkindigine qatysty depýtattyq saýalǵa jaýap berdi, dep habarlaıdy Egemen.kz.
«Sý resýrstaryn basqarý jónindegi jeke memlekettik organdy qurý máselesine qatysty Qazaqstan Respýblıkasy Prezıdentiniń 2019 jylǵy 17 maýsymdaǵy Jarlyǵymen Qazaqstan Respýblıkasynyń jańa ekologııa, geologııa jáne tabıǵı resýrstar mınıstrligi quryldy, onda jerasty sýlary men sýdyń sapasyn qosa alǵanda, sý qoryn paıdalaný jáne qorǵaý saıasatyn qalyptastyrý jáne iske asyrý, gıdrologııalyq jáne gıdrohımııalyq aqparatty jınaý, óńdeý jáne taldaý sııaqty mańyzdy fýnksııalar shoǵyrlanǵan», dep jazdy Asqar Mamın depýtattyq saýalǵa bergen jaýabynda.
Onyń aıtýynsha, atalǵan memlekettik organǵa sý resýrstaryn tıimdi basqarý jónindegi mindetterdi tolyq kólemde iske asyrýǵa múmkindik beretin qajetti quzyretter men ókilettikter berilgen.
«Osyǵan baılanysty sý resýrstaryn basqarý jónindegi jeke Memlekettik organ qurý máselesi qazirgi ýaqytta qaralmaıdy», dep atap ótti Premer-Mınıstr.