El Táýelsizdigine 30 jyl tolýyna oraı, Túrkistan oblysy qoǵamdyq damý basqarmasyna qarasty «Jastar resýrstyq ortalyǵy» KMM uıymdastyrýymen oblys ákiminiń kýbogy úshin «Túrkistan – kóshbasshylar alańy» atty respýblıkalyq pikirsaıys týrnıri ótti.
Týrnır shymyldyǵyn ashqan oblystyq qoǵamdyq damý basqarmasynyń basshysy Ańsar О́serbaev jastardyń birlik, yntymaǵyn nyǵaıtýǵa baǵyttalǵan is-sharanyń tabysty bolaryna senim bildirip, jastarǵa sáttilik tiledi. Eki kúnge sozylǵan týrnırge Almaty, Batys Qazaqstan, Shyǵys Qazaqstan, Túrkistan, Jambyl oblystarynan jáne Nur-Sultan, Almaty, Shymkent qalalarynan 19 joǵary oqý orny men orta arnaýly oqý oryndarynan 64 stýdent qatysty. Oıyndar amerıkalyq – parlamenttik jáne Lınkoln–Dýglas formattarynda ótti. Tartysty ótken sóz jarysy qorytyndysy boıynsha «Muhtar Maǵaýın» fraksııasy men Abaı atyndaǵy Qazaq ulttyq pedagogıkalyq ýnıversıtetiniń (Almaty) atynan shyqqan О́rken Muhametalıuly, Aıym Nursapa jeńimpaz atansa, «Qoja Ahmet Iаsaýı» fraksııasy men M.Áýezov atyndaǵy Ońtústik Qazaqstan ýnıversıtetiniń (Shymkent) stýdentteri Aqan Besbaev, Erasyl Anarhanuly II oryndy ıelendi. «Qudaıbergen Jubanov» fraksııasy men Q.Jubanov atyndaǵy Aqtóbe óńirlik ýnıversıtetiniń stýdentteri Bitimbaı Islambek, Tolqyn Shamıtova III oryn aldy. Sonymen qatar pikirsaıys dodasyna qatysýshylar men belsendi uıymdastyrýshylar da «Úzdik gıd», «Úzdik delegasııa», «Jas talpynys», «Úzdik post», «Úzdik tóreshi», «Úzdik spıker», «Úzdik talpynys» atalymdarymen marapattaldy.
Týrnır barysynda qatysýshylar úshin Túrkistan qalasyna saıahat uıymdastyryldy. Sondaı-aq jas pikirsaıysshylar aımaqty kógaldandyrýǵa baǵyttalǵan «Gúldengen Túrkistan» eko-aksııasyna úles qosyp, Jeńis saıabaǵyna tal ekti.