Qaskeleńde toı kortejinde júrgen kóliktiń salonynan áýege oq atqan buzaqy anyqtaldy. Polısııa er adamnyń ústinen qylmystyq is qozǵady, dep habarlaıdy Egemen.kz.
Almaty oblystyq Polısııa departamenti habarlaǵandaı, Qaraısaı aýdandyq polısııa basqarmasynyń qyzmetkerleri áleýmettik jelige monıtorıng jasaý barysynda er adamnyń kólik ishinen áýege oq atqany beınelengen beıne materıaldy baıqady. Jedel izdestirý is-sharasy barysynda bul oqıǵanyń 23 qazan kúni saǵat 17:30-da Qarasaı aýdanyna qarasty Qaskeleń qalasynyń Abylaı han kóshesinde oryn alǵany anyqtaldy.
«Polısııa qyzmetkerleriniń izdeý is-sharalary nátıjesinde áýege oq atqan adamnyń aty-jóni anyqtaldy. Ol 25 jastaǵy Qarasaı aýdanynyń turǵyny bolyp shyqty. Onyń ústinen QR Qylmystyq kodeksiniń 293-baby 3-tarmaǵymen qylmystyq is qozǵaldy. «Mercedes» markaly kólik aıyppul turaǵyna qoıylyp, QR Ákimshilik quqyq buzýshylyq týraly kodekstiń 590-baby 2 tarmaǵymen ákimshilik hattama toltyryldy. Qazaqstannyń qoldanystaǵy zańnamasynyń normalaryna sáıkes jaýapqa tartý úshin kortejdiń basqa da qatysýshylaryn anyqtaý is-sharalary júrgizilip jatyr», dep túsindirdi vedomstvodan.