Tennısshilerdiń dúnıejúzilik reıtıngi qaıta jańartyldy. Erler men áıelderdi qosa alǵanda, qazirgi kezde Qazaqstannyń tórt ókili «TOP-100» oıynshynyń qatarynda enip otyr.
Jerlesterimizdiń arasynda eń úzdik kórsetkish Elena Rybakınaǵa tıesili. Jýyrda Máskeýde ótken Kreml kýbogy úshin jarystaǵy sátsizdiginen keıin ol eki satyǵa tómendep, 19-oryndy ıelenýde. Atalǵan týrnırdiń úshinshi kezeńine deıin jetken Iýlııa Pýtınseva 44-orynǵa turaqtasa, Zarına Dıas «TOP-100» tennısshiniń qataryna qaıta qosyldy. Esterińizge sala keteıik, Zarına kúni keshe ǵana AQSh-ta ótken týrnırdiń fınalyna shyǵyp, sheshýshi tusta jergilikti tennısshi Medıson Brenglden jeńilgen bolatyn. Al WTA reıtıngindegi úzdikter kóshin aýstralııalyq Eshlı Bartı bastap tur. Odan keıingi satylarǵa Belorýssııanyń betke ustary Arına Sobolenko, Chehııanyń qos myqtysy – Karolına Plıshkova men Barbora Kreıchıkova jáne ıspanııalyq Garbıne Mýgýrýsa jaıǵasty.
ATR reıtınginde Serbııanyń sańlaǵy Novak Djokovıchke teń keler eshkim tabylar emes. Ony reseılik Danııl Medvedev ókshelep keledi. Sondaı-aq úzdik bestiktiń qatarynda grekııalyq Stefanos Sısıpas, germanııalyq Aleksandr Zverev jáne ıspanııalyq Rafael Nadal bar. Al qazaqstandyqtar arasynda tek Aleksandr Býblıktiń ǵana qarqyny jaman emes. Bul kúnderi ol 34-orynda.