Qarashadan bastap bizdiń elde de álemdik tájirıbedegi VAR júıesi qoldanylmaq. Qazaqstannyń fýtbol federasııasy men kásipqoı fýtbol lıgasy OLIMPBET-Qazaqstan kýbogy oıyndarynda VAR júıesin qoldanýǵa FIFA-dan resmı ruqsat aldy.
Qazaqstan fýtbol federasııasy baspasóz qyzmetiniń taratqan málimeti boıynsha, qazirgi ýaqytta birqatar otandyq fýtbol tóreshileri, oqýdyń barlyq kezeńinen ótip, resmı oıyndarda VAR (video assistant referee) jáne AVAR (assistant VAR) retinde jumys isteý úshin FIFA-dan qajetti lısenzııalaryn alǵan.
Sóıtip kelesi maýsymda OLIMPBET-Sýperkýbok, OLIMPBET-Chempıonat jáne OLIMPBET-kýbogynyń oıyndarynda qyzmet kórsetýge josparlanǵan barlyq tóreshi úshin oqytý jáne lısenzııalaý prosesi jalǵasýda. Al osy maýsymdaǵy kýboktyń jartylaı fınaldyq jáne fınaldyq oıyndary FIFA jáne IFAB bekitken VAR hattamasyna sáıkes ótedi.
Fýtboldan Qazaqstan kýbogy oıyndarynyń jartylaı fınalynda «Tobyl» – «Shahter» jáne «Astana» – «Qaırat» klýbtary baq synaıdy. Alǵashqy oıyndar 6-7 qarashaǵa, qarymta matchtar 20-21 qarashaǵa josparlanǵan. Aıta keteıik, sońǵy ret Qazaqstan kýbogyn 2019 jyly Qyzylordanyń «Qaısary» jeńip alǵan bolatyn. Al byltyr pandemııaǵa baılanysty kýbok básekesi uıymdastyrylǵan joq.