2021 jylǵy 1 qarashada QR Premer-Mınıstri Asqar Mamın Shotlandııanyń Glazgo qalasynda klımattyń ózgerýi jónindegi BUU Negizdemelik konvensııasynyń Álem kóshbasshylary sammıtine (SOR26) qatysty, dep habarlaıdy Egemen.kz.
Úkimet basshysy óz sózinde Qazaqstan álemde alǵashqylardyń biri bolyp Parıj kelisimin ratıfıkasııalaǵanyn atap ótti (2016 jylǵy 6 jeltoqsanda). Atalǵan qujatty júzege asyrý úshin QR 2030 jylǵa qaraı parnıktik gaz shyǵaryndylaryn 15%-ǵa qysqartýǵa nıetti. Qoıylǵan maqsatqa qol jetkizý úshin Qazaqstan ulttyq deńgeıde aıqyndalǵan úlesin (UDAÚ) jańartty, sondaı-aq jańa Ekologııalyq kodeksti qabyldady.
«Qazaqstan jańartylatyn energııa kózderinen alynatyn energııa kólemin 3%-dan 15%-ǵa deıin 5 ese, ekologııalyq taza kózderden óndiriletin energııa óndirisin 20%-dan 38%-ǵa deıin 2 ese arttyrady. 2025 jylǵa qaraı 2 mlrd-tan astam aǵash otyrǵyzý esebinen kómirtekti sińirý áleýeti artady. Kómirden óndiriletin energııa úlesi 70%-dan 40%-ǵa deıin tómendeıdi dep josparlanýda», dedi A. Mamın.
Premer-Mınıstr 2020 jyly jeltoqsanda ótken Klımattyq ambısııalar jónindegi sammıtte QR Prezıdenti Qasym-Jomart Toqaev Qazaqstannyń 2060 jylǵa qaraı kómirtekti beıtaraptyqqa qol jetkizý maqsatyn jarııalaǵanyn atap ótti. QR Úkimeti ony iske asyrý úshin energetıka, óńdeý ónerkásibi, aýyl jáne orman sharýashylyǵy, kólik, TKSh jáne qaldyqtardy kádege jaratýǵa basa nazar aýdara otyryp, ekonomıkanyń barlyq sektorlarynda eleýli reformalardy kózdeıtin strategııalyq qujatty ázirleýdi aıaqtaýda.
Qazaqstannyń kómirtegi beıtaraptyǵyna jer men sýdy paıdalanýdyń ornyqtylyǵyn, ekonomıkanyń energetıkalyq tıimdiligin arttyrý, elektrlendirý jáne ekologııalyq taza, onyń ishinde jańartylatyn energııa kózderin keń aýqymdy paıdalaný arqyly qol jetkiziletin bolady. Parnıktik gaz shyǵaryndylaryn azaıtý josparlaryn iske asyrý kezinde naryq tetikteri men jeke ınvestısııalardyń áleýeti barynsha paıdalanylady.
Úkimet basshysy Qazaqstannyń ornyqty damý boıynsha Ortalyq Azııanyń Aımaqtyq klımattyq haby bolýǵa beıildiligin rastady. Bul aımaq elderiniń kúsh-jigerin AHQO Jasyl qarjy ortalyǵynyń jáne klımattyq kún tártibimen aınalysatyn basqa da aımaqtyq uıymdardyń alańynda tehnologııalar transferti, jasyl qarjylandyrýdy tartý, bilim men ınnovasııalar almasý arqyly «jasyl» ekonomıkalyq ósýdi qamtamasyz etýde biriktirýge múmkindik beredi.
SOR26 sheńberinde Qazaqstan Ormandar jáne jerdi paıdalaný deklarasııasyna, sondaı-aq Jastarǵa bilim berý jáne olardy tartý mindettemesine qosyldy.
Álem kóshbasshylary sammıti kezinde Qazaqstan Úkimetiniń basshysy Fınlıandııa Prezıdenti Saýlı Nıınestıomen, Mońǵolııa Prezıdenti Ýhnaagıın Hýrelsýhpen, Qyrǵyzstan Prezıdenti Sadyr Japarovpen, Latvııa Prezıdenti Egıls Levıtspen, Nıderlandy Premer-Mınıstri Mark Rıýttemen, Úndistan Premer-Mınıstri Narendra Modımen jáne AQSh Prezıdentiniń klımat máseleleri jónindegi Arnaıy ýákili Djon Kerrımen kezdesý ótkizdi.
Qazaqstannyń Dúnıejúzilik saýda uıymynyń 12-shi mınıstrlik konferensııasyna (Jeneva qalasy, 2021 j. 30 qarasha-3 jeltoqsan) tóraǵalyq etýge daıyndyǵy aıasynda QR Premer-Mınıstri A. Mamın DSU Bas dırektory Ngozı Okondjo-Ivealamen jáne Ulybrıtanııanyń Memlekettik syrtqy saýda mınıstri Enn-Marı Trevelıanmen kezdesti.
Sapar jáne ekijaqty kezdesýler qorytyndysy boıynsha Qazaqstan Respýblıkasy men Ulybrıtanııa jáne Soltústik Irlandııa Qurama Koroldigi úkimetteriniń strategııalyq seriktestik jáne klımattyń ózgerýine qarsy áreket etý jónindegi birlesken kúsh-jiger týraly birlesken málimdemesi qabyldandy.
Qujat qorshaǵan ortany qorǵaý, ekonomıkany dekarbonızasııalaý salasyndaǵy yntymaqtastyqty nyǵaıtýdy, jańartylatyn energııa kózderin damytý, «jasyl» qarjylandyrý, ormandardy saqtaý, jerdi paıdalanýdyń tıimdiligin arttyrý jáne t. b. salalardaǵy Qazaqstannyń áleýetin iske asyrýdy kózdeıdi.
«Qazaqstan táýelsizdik alǵan jáne dıplomatııalyq qatynastar ornatylǵan sátten bastap 30 jyl ishinde Qazaqstan men Ulybrıtanııa óz baılanystaryn ózara senimge, ortaq qundylyqtar men tıimdi yntymaqtastyqqa negizdelgen berik seriktestikke aınaldyrdy», — dep atap ótilgen birlesken málimdemede.