Memlekettik kirister komıteti 2020 jylǵy múlik salyǵyn tóleý merziminiń aıaqtalǵanyn málimdedi, dep habarlaıdy Egemen.kz.
«2020 jyl úshin jeke tulǵalardyń múlik salyǵyn tóleý merzimi 2021 jyldyń 1 qazanynda aıaqtaldy. Qazirgi ýaqytta memlekettik kirister organymen Kaspi.kz mobıldi qosymshasy arqyly merziminde múlik salyǵyn tólemegen jeke tulǵalarǵa push-habarlama jiberý josparlanýda», delingen resmı habarlamada.
Al salyq zańnamasy boıynsha memlekettik kirister organdary merziminde oryndalmaǵan salyq mindettemesiniń tólenýin qadaǵalaıdy. Azamattarǵa aldymen salyq bereshegi týraly habarlama jiberiledi. Osy joly 1 qazanǵa deıin eskertýler taratyldy.
«Habarlama oryndalmaǵan jáne bereshek ótelmegen jaǵdaıda memlekettik kiris organdary bereshekti óndirip alý týraly salyqtyq buıryq ázirleıdi. Ony májbúrlep oryndatý úshin jeke sot oryndaýshylarynyń óńirlik palatalaryna jiberetin bolady. Osyǵan baılanysty 2020 jylǵa múlik salyǵyn tólemegen azamattardan salyqtyq bereshekti óteýdi suraımyz», delingen resmı habarlamada.
Aıta keteri, jeke tulǵalar salyqty «e-Salyq Azamat», ekinshi deńgeıdegi bankterdiń mobıldi qosymshalary men elektrondyq úkimet portaly arqyly tóleı alady. Budan bólek, bank bólimshelerinde tólem termınaldary arqyly qolma-qol aqshamen jáne bank kartalarymen salyq aýdarýǵa múmkindik bar.