Belgradta ótip jatqan bokstan álem chempıonatynyń jartylaı fınalyna Qazaq eliniń bes bylǵary qolǵap sheberi joldama aldy. Bul – bıylǵy álem chempıonatynda dál osynsha boksshymyz júldege qol jetkizdi degen sóz. Biraq onyń nesheýi altyn medal bolatynyn aldaǵy jekpe-jekter anyqtap beredi. О́kinishke qaraı, jartylaı fınalǵa joldama beretin jekpe-jekterde taǵy bes boksshymyz qarsylastaryna ese jiberip, júldeli oryndarǵa jete almaı qaldy. Dese de jerlesterimizdiń bári taza jeńildi dep aıta almaımyz. Tóreshilerdiń keıbir jigitterimizge qatysty tóreligi kúmán týǵyzǵany ras.
Sonymen, Qazaqstan quramasynyń boksshylarynan jartylaı fınalǵa Temirtas Júsipov (48 kg), Sáken Bıbosynov (51 kg), Mahmud Sabyrhan (54 kg), Serik Temirjanov (57 kg) jáne Abylaıhan Júsipov (67 kg) joldama aldy. Baıqasańyzdar, jartylaı fınalǵa tek jeńil salmaqtaǵy otandastarymyz ǵana shyqty. Al aýyr salmaqtaǵy jigitterimizdiń kóbi shırek fınalǵa jetpeı súrinip jatty. Demek ulttyq qurama bas bapkeri Qaırat Sátjanovtyń aldaǵy ýaqytta aýyr salmaqtaǵy boksshylarmen kóbirek jumys isteýine týra keledi.
Seısenbi kúni ótken shırek fınal jekpe-jegin qazaqstandyq sportshylardan birinshi bolyp 48 kılo salmaqta tájirıbeli boksshymyz Temirtas Júsipov bastap berdi. Alǵashqy aıqasynda rıng qojaıyny Omer Ametovıchten 4:1 esebimen aılasyn asyrǵan jerlesimiz shırek fınalda óziniń basty qarsylasy – ózbekstandyq Nodırjon Mırzahmedovpen kezdesti. Bul jekpe-jek Temirtas úshin tek jartylaı fınaldyń joldamasyn sarapqa salatyn aıqas qana emes, osydan sanaýly aı buryn Reseı sharshy alańynda ketken esesin qaıtaratyn tamasha múmkindik bolatyn. Sondyqtan ol bul kezdesýde qalaıda jeńiske jetýi tıis edi. Birinshi raýndtan bastap araqashyqtyqty saqtap, qarymta shabýylmen jumys istegen Júsipov qarsylasyna esh múmkindik qaldyrmady. Ekinshi jáne úshinshi raýndta da belsendigin bir sátke de tómendetpegen jerlesimiz qarsy soqqymen qarsylasyn kútip alyp otyrdy. Temirtas sharshy alańda erkin qımyldap, Mırzahmedovtiń birde-bir soqqysyn ózine darytqan joq. 2019 jáne 2021 jyldary eki dúrkin Azııa chempıony atanǵan ózbek boksshynyń kóp soqqysy aýa qarmap qalyp jatty. Sóıtip, úsh raýnd qorytyndysy boıynsha tóreshilerdiń biraýyzdan shyǵarǵan sheshimimen jeńiske jetken otandasymyz ketken esesin de qaıtardy. Endi Temirtas fınalǵa joldama beretin básekede Belarýs ókili Evgenıı Karmılchıkpen judyryqtasady.
51 kılo salmaqtaǵy ókilimiz Sáken Bıbosynov eki jyl burynǵy erligin qaıtalady. 2019 jyly Reseıde ótken álem birinshiliginde qola medal ıelengen jerlesimiz bıyl taǵy da jartylaı fınalǵa shyqty. Endi Bıbosynov qalǵan jekpe-jekterinde de aıanyp qalmas. Ol ½ fınalda taılandtyq Tanarat Saengfetpen kezdesedi.
Eresekter arasynda tuńǵysh ret álem chempıonatyna qatysyp jatqan 54 kılo salmaqtaǵy Mahmud Sabyrhan shırek fınalda brazılııalyq Maıkl Trınıdadpen kezdesip, óte tájirıbeli qarsylasynan aılasyn asyrdy. Osylaısha, 20 jastaǵy otandasymyz alǵashqy álem birinshiliginde-aq júldegerler qatarynan kórinip otyr. Endi ol fınal joldamasyn úndistandyq Akash Kýmarmen sarapqa salady.
Olımpıadadaǵy sátsizdiginen keıin qateligimen jumys istep, jeńilisinen sabaq alǵan 57 kılodaǵy Serik Temirjanov álem birinshiliginde táýir judyryqtasyp júr. Barlyq qarsylasynan 5:0 esebimen basym túsip kele jatqan pavlodarlyq boksshy bul kezdesýinde de Reseı chempıony Edýard Savvındi 5:0 nátıjesimen aıqyn utty. Endi jartylaı fınalda qazaqstandyq boksshyny kýbalyq Osvel Kabalero Garsııa kútip tur. Bul osy álem birinshiligindegi Qazaqstan jáne Kýba boksshylarynyń alǵashqy jekpe-jegi bolmaq.
El qorjynyna jartylaı fınaldyń sońǵy joldamasyn Qazaqstan quramasynyń kapıtany Abylaıhan Júsipov saldy. 67 kılo salmaqta judyryqtasatyn otandasymyz 1/4 fınalda mońǵolııalyq Chınzorıg Baatarsýhty eline qaıtardy. Sharshy alańda óz ústemdigin kórsetken Júsipov tóreshilerdiń biraýyz sheshimimen basym túsip, osy birinshiliktegi mońǵoldardyń sońǵy úmitin jarys jolynan shyǵaryp jiberdi. Abylaıhan jartylaı fınalda 2019 jylǵy Azııa chempıonatynyń kúmis júldegeri japonııalyq Sevonres Okazavamen kúsh synasady.
О́kinishke qaraı, shırek fınalda óner kórsetken taǵy bes boksshymyz jahandyq dodadaǵy jekpe-jekterin aıaqtady. Atap aıtqanda, aǵaıyndy Samatáli (60 kg) jáne Sanatáli Tóltaev (63,5 kg), Aslanbek Shymbergenov (71 kg), Nurqanat Raıys (75 kg) jáne Nurbek Oralbaı (80 kg) júldege synyq súıem qalǵanda jeńilip, elge medalsiz oralatyn boldy. Degenmen, tóreshilerdiń sheshimine qaramastan, Sanatáli Tóltaev, Nurqanat Raıys jáne Nurbek Oralbaıdy jeńildi dep aıta almasaq kerek. Tipti bokstan memlekettik jattyqtyrýshy Baqtııar Artaev tóreshilerge Sanatáli Tóltaevtyń jekpe-jegin qaıta qaraýǵa shaǵym túsirgen. Alaıda qazylar alqasy bul shaǵymdy qaraýdan bas tartqan. Jalpy búginge deıin álem chempıonatynda bapkerler tarapynan tóreshilerdiń jumysyna 17 ret shaǵym túsirilgen eken.
Aıta keteıik, jartylaı fınal jekpe-jekteri búginge, al fınaldyq aıqastar 5-6 qarashaǵa josparlanǵan.